Bakı Olimpiya Stadionunda yerləşən Azərbaycan Cüdo Federasiyasının təlim-məşq zalında yeni təyin olunmuş məşqçilər heyəti kişilərdən ibarət milli komandanın üzvlərinə təqdim edilib.
Federasiyadan "Report"a verilən məlumata görə, qurumun vitse-prezidenti Sadıq Sadıqov təqdimat mərasimində çıxış edərək, millinin heyətində gənc, perspektivli cüdoçuların çox olduğunu, eyni zamanda yeni məşqçilər heyətinin də kifayət qədər təcrübəli olduğunu söyləyib və bu səbəbdən komandada sağlam rəqabətin yaranacağına inandığını bildirib.
Yığmanın sabiq baş məşqçisi Ruslan Maşurenko isə komanda ilə vidalaşıb. O, yeni məşqçilər heyətinə və cüdoçulara uğur diləyib.
Sonra tanınmış cüdo mütəxəssisi, federasiyanın Daimi Fəaliyyət Komissiyasının sədri Ağayar Axundzadə çıxış edərək yeni məşqçilər heyətinə, komandaya bir ağsaqqal kimi öz xeyir-duasını verib, müvəffəqiyyət arzulayıb. Təcrübəli mütəxəssis cüdoçuların 2024-cü ildə Parisdə keçiriləcək növbəti olimpiya oyunlarında daha yaxşı nəticələr göstərəcəklərinə inandığını ifadə edib.
Sonra milli komandanın yeni baş məşqçisi Mövlud Mirəliyev göstərilən etimada görə Azərbaycan Cüdo Federasiyasının rəhbərliyinə minnətdarlığını bildirib və onlara bəslənən ümidi doğrultmaq üçün var gücləri ilə çalışacaqlarını söyləyib. Təcrübəli cüdoçu, Avropa və dünya çempionatının mükafatçısı Nicat Şıxəlizadə peşəkar idmançı karyerasını başa vurduğuna görə, milli komandaya yeni kapitan seçilib. Avropa çempionu, iki dəfə dünya çempionatının gümüş medalçısı və Rio Olimpiadasının mükafatçısı Rüstəm Orucov bundan sonra kişilərdən ibarət milli komandanın kapitanı olacaq.
Təqdimat mərasimində federasiyanın baş katibi Elmar Babanlı və onun müavini Elnur Əşrəfoğlu da iştirak edib.
Xatırladaq ki, yeni məşqçilər heyətində Mövlud Mirəliyevlə yanaşı Elçin İsmayılov, Zaur Babayev, Elxan Rəcəbli, Şümşat Bəhramov və İlham Məmmədov yer alıb.
pia.az
Digərxəbərlər
Populyar xəbərlər
