Rusiyanın Sankt-Peterburq şəhərində qarpız satan azərbaycanlı yeniyetmə mübahisə zəminində yerli sakini bıçaqlayaraq öldürüb. Virtualaz.org Rusiya KİV-lərinə istinadən xəbər verir ki, hadisə iyulun 24-də baş verib, məhkəmə iyulun 26-da yeniyetmənin barəsində həbs qətimkan tədbiri seçib.
Hadisə Peterburqun Polkovsk şossesindəki “Produktı” adlı gecə ticarəti köşkündə baş verib. Həmin ticarət köşkündə qarpız satan azərbaycanlı yeniyetmə 19 yaşlı Peterburq sakinini bıçaqla ürəyindən vurub. Bildirilir ki, mübahisəyə səbəb sərxoş halda köşkə gələn həmin peterburqlu gəncin Murada sataşması, qarpızlardan birini yerə salması olub.
“Gənc oğlan dayanmışdı, qarpızlardan birini yer atdı, onların arasında münaqişə yarandı və satıcı bıçaqla gəncin ürəyindən vurdu”,-şahidlərdən biri deyib.
Tanıyanlar deyirlər ki, Murad sakit və az danışan yeniyetmə idi, amma belə alınıb ki, yetkinlik yaşına çatmayan bu azərbaycanlı mübahisəni davam etdirmədən bıçağa əl atıb.
Peterburq məhkəmələrinin Birləşmiş mətbuat xidmətindən bildiriblər ki, yeniyetmə günahını etiraf edib və barəsində ev dustaqlığı qərarı verilməsini istəyib. Amma məhkəmə onun barəsində 2 aylıq həbs qətimkan tədbiri seçməyi düzgün sayıb.
pia.az