Abbas Lisani 8 il azadlıqdan məhrum edildi, ailəsi ilə birlikdə sürgün olundu

“GünAZ TV” xəbər verir ki, hökm Ərdəbil İnqilab Məhkəməsinin 1-ci şöbəsi tərəfindən iyulun 8-də fəalın vəkilinə elan olunub.

Hökmə əsasən o, 8 il həbs və ailəsi ilə birlikdə 2 il Yəzd şəhərinə sürgünə məhkum olunub.

Abbas Lisani yanvarın 15-də məhkəmə iclasına qatılmaq üçün müraciət etdiyi Təbriz İnqilab Məhkəməsinin 2-ci şöbəsində yoxa çıxıb. Fəalın ailə üzvləri və azərbaycanlı fəallar səlahiyyətli orqanlara müraciət edib araşdırdıqdan sonra onun təhlükəsizlik və məhkəmə orqanlarının birgə tədbiri ilə Ərdəbilə aparıldığı məlum olub. O təxminən 6 aydır ki, Ərdəbil zindanında saxlanılır.

Ərdəbil prokurorunun müavini hazırladığı iddianamədə fəala qarşı əsası olmayan “Qərbi Azərbaycan əhalisini silahlanmağa təhrik etmək”, “milli təhlükəsizliyə qarşı cəhd göstərmək”, “qanunsuz qrup yaratmaq” və “sistemin əleyhinə təbliğat aparmaq” kimi ağır ittihamlar irəli sürüb.

Abbas Lisani məhkəmədə irəli sürülən bütün ittihamları rədd edərək bu prosesi Azərbaycanda gedən milli-mədəni hərəkatı radikal göstərməyə yönəlmiş bir ssenarinin davamı olduğunu bildirib.

İttihamların qondarma olduğuna Güney Azərbaycan Milli Hərəkatının fəalları da müxtəlif formalarda etiraz bildirib.

Tanınmış fəalın sonuncu məhkəmə iclası iyunun 27-də Ərdəbil İnqilab Məhkəməsinin 1-ci şöbəsində keçirilib. Fəal proses zamanı hakimə xitabən bildirib ki, hər kəs mənə qarşı irəli sürülmüş ittihamların əsassız və yalan olduğunu bildiyindən, ümid edirəm ki, məhkəmə orqanları bu cinayət işində həssasiyyəti və müstəqilliyini qorumağın zəruri olduğunu anlayır.

Fəal həmçinin Azərbaycan milli hərəkatının sivil olduğuna toxunaraq demişdir: “Hərəkat özündən başqa heç bir ünsürdən asılı deyil, ona görə də ona digər fikirləri yeritmək və bunun nəticəsində Azərbaycan milli-mədəni fəallarına qarşı repressiya həyata keçirmək cəhdləri uğursuzluğa düçar olacaq.”

Azərbaycanlı fəal həbsxanada mayın 27-dən iyunun 15-dək aclıq aksiyası keçirib. Tanınmış fəal məhkəmə prosesində özünü müdafiə etmək üçün vəkili tərəfindən hazırlanıb zindana verilən dosye ona təhvil verilməməsinə etiraz olaraq aclıq edib.

Abbas Lisani uzun illərdir ki, Azərbaycan türk millətinin demokratik və milli hüquqları uğrunda mədəni mübarizə aparır. Şəffaf və dinc mübarizəsi ilə seçilən fəal dəfələrlə təhlükəsizlik qüvvələri tərəfindən saxlanılıb, uzun illər həbs olunub və müxtəlif təzyiqlərə məruz qalıb.

pia.az