Şahlar Əsgərov: “Orta məktəblərə alimlərin adını vermək lazımdır”

Bunu Moderator.az-a açıqlamasında professor Şahlar Əsgərov “orta məktəblərimizdə şagirdlərdə elmə maraq yaratmaq üçün nə etməliyik?” sualını cavablayan Şahlar Əsgərov bildirib:

"Bu, çox aktual və vacib sualdır. Bəlkə də bir qədər gecikmişik. Kaş bu sualın həllinə 20 il bundan əvvəl başlayaydıq və çözələyə-çözələyə gələrdik. Çünki elm mənəviyyatın bir hissəsidir. Elm 4 yerə bölünür, dəqiq, texniki, təbiət və humanitar...

Dəqiq elmlər elmi möcüzələr, cihazlar, maşınlar yaratmalıdır. Bunlar maddi dəyər sayılır. Texniki elmlər maddi dəyərlər, humanitar elmlər isə mənəvi dəyərlər yaratmaqla məşğuldur. Yəni yazıçılarımız, şairlərimiz, rəssamlarımız öz əsərləri ilə mənəvi dəyər yaratmalıdır.

Biz elmə marağı məktəbdən başlamalıyıq. Gənc özü şüurlu insandır, özü də dünyanı, kainatı, şəhəri başa düşməyə çalışır. Biz cəmiyyətimizi, şəhərimizi elə nizamda saxlamalıyıq ki, seçimi gənc özü etməlidir. Demokratiya, liberal dəyərlərin ən vacib şərti budur ki, seçimi gənc özü etsin.

Orta məktəblərə alimlərin adını vermək lazımdır. Hansı alim hansı məktəbi bitiribsə, onun adını ora verməliyik. Belə olduqda, şagirdlər onunla maraqlanır, adını, fəaliyyətini mənimsədikdə ən azından həmin alimə bənzəmək istəsin.

Eyni zamanda məktəbliyə də, gəncə də başa salmaq lazımdır ki, elm asan deyil, bu yolda getmək cəngavərlikdir. Yəni şagirdin, gəncin özü elmlə bağlı qərara gəlməlidir.

Bir çox ölkələrdə texniki muzeylər var. Bunu dəfələrlə təklif etmişəm. Texniki muzeyə daxil olan zaman orada texniki təmayülün əyani şahidi oluruq. Bununla da orada gəzən gənclər, məktəblilər inkişaf prosesini öz gözləri ilə görüb, elmə daha da həvəslənəcəklər. Alimliyin yaradıcı sənət olduğunun şahidi olacaq. İstehsalçı olmaq lazımdır, istehlakçı yox.

Alim olmayana alim diplomunu verməyək. 10 şagirddən, tələbədən biri elmi seçərsə də bu yaxşı göstəricidir. Yalançı alimləri elmə buraxmaq lazım deyil. Bu təmiz suya çirkab atmış kimidir. Sanki təmiz suyu çirkləndirirsən. İndi alimlər çox artıb. Elmi ad layiq olan insana verilsə, problemimiz olmaz. Bu istiqamətdə islahatlara ehtiyac var”.

pia.az