NATO Ukrayna Silahlı Qüvvələri üçün təlim mərkəzi açmağı planlaşdırır

Poliqon xəbər verir ki, bu barədə İspaniyanın “El Pais” qəzeti diplomatlara istinadən məlumat yayıb. Qəzet yazır ki, təşəbbüsün Brüsseldə NATO-ya üzv ölkələrin müdafiə nazirlərinin görüşündə müzakirəsi planlaşdırılır.

Nəşrin yazdığına görə, layihə 2024-cü ilin iyulunda Vaşinqtonda keçiriləcək NATO sammitində yekun təsdiqini ala bilər. Fevralın 14-15-də Brüsseldə baş tutan görüşdə maliyyələşmənin təfərrüatları və təlimə hansı təlimatçıların cəlb olunacağı müzakirə olunur. Xüsusən də, təlimatçıların yeni bazada daimi əsasda yerləşməsi və ya müəyyən müddətə mərkəzə göndərilməsi məsələsi həll edilir. Mərkəzin dəqiq harada yerləşəcəyi qeyd olunmayıb.

Qeyd edək ki, NATO-nun 2023-cü ilin yayında Vilnüsdə keçirilən sonuncu sammitində G7 ölkələri Ukraynaya təhlükəsizlik zəmanəti verən bəyannamə imzalayıblar. Ümumi sənəddəki təminatlar arasında Ukraynanın müdafiə sənayesinin inkişafı, kəşfiyyat məlumatlarının mübadiləsi, müasir silahların, o cümlədən hava hücumundan müdafiə sistemləri, artilleriya, uzaq mənzilli silahlar, zirehli texnikanın ötürülməsi, habelə hərbi qüvvələrin təlimi daxildir.

Poliqon.info