İsrail-HƏMAS razılaşması üzrə Qahirə danışıqları üç gün uzadılıb

Poliqon xəbər verir ki, bu barədə The New York Times qəzeti Misir rəsmisinə istinadən yazır. Mənbənin sözlərinə görə, sövdələşmənin müzakirəsi “müsbət tonda” gedir.

NYT və Reuters yazır ki, danışıqların ilk gününün nəticələrinə görə, görüş iştirakçıları razılığa gəlməyiblər. NYT-nin mənbələrindən biri bildirib ki, tərəflər arasında aparılan müzakirələrdə əsas məsələ girovlar müqabilində İsrail həbsxanalarından buraxılacaq fələstinli məhbusların sayı ilə bağlıdır. ABŞ rəsmisinin sözlərinə görə, danışıqlar növbəti üç gün ərzində daha aşağı səviyyədə aparılacaq.

Danışıqların ilk günündə Mərkəzi Kəşfiyyat İdarəsinin direktoru Uilyam Berns və İsrail kəşfiyyat xidmətinin Mossad rəhbəri David Barnea danışıqlarda iştirak ediblər. Onlar Misir və Qətərin yüksək vəzifəli şəxsləri ilə görüşüblər - bu ölkələr danışıqlarda vasitəçi kimi çıxış edirlər.

“Axios” portalının yazdığına görə, İsrailin Baş naziri Benyamin Netanyahu bir girov müqabilində üç fələstinli məhbusu azad etməyə hazır olduğunu açıqlayıb. Eyni sxem 2023-cü ilin noyabrında atəşkəs zamanı qüvvədə idi.

Nəşrin məlumatına görə, ABŞ prezidenti Co Bayden telefon danışığında İsrailin Baş nazirini sövdələşmənin həyata keçirilməsi üçün çeviklik nümayiş etdirməyə və daha çox məhbusu azad etməyə çağırıb.

Qeyd edək ki, fevralın əvvəlində Parisdə İsrail, Misir, Qətər və ABŞ nümayəndələri bir neçə mərhələni, fələstinli əsirlərin israilli girovlarla dəyişdirilməsini və müharibəni dayandırmaq öhdəliyi olmadan uzunmüddətli atəşkəsi özündə əks etdirən çərçivə sazişi barədə razılığa gəliblər. Qahirədə keçiriləcək görüşdə yekun saziş layihəsinin formalaşdırılması planlaşdırılır.

Poliqon.info