Liderləri Yevgeni Priqojinin ölümündən sonra “Vaqner” üzvləri Suriyanı tərk edəcək və oradakı aktivlərini İrana ötürəcəklər...
Poliqon xəbər verir ki, bu barədə Müharibənin Öyrənilməsi İnstitutunun (ISW) hesabatında deyilir.
İslam İnqilabı Keşikçiləri Korpusunun (SEPAH) şəxsi heyətinin Suxnada (mərkəzi Suriya) əvvəllər “Vaqner” muzdluları tərəfindən zəbt olunmuş mövqeləri tutduğu qeyd edilir.
"Rusiya Müdafiə Nazirliyi əvvəllər “Vaqner”ə sentyabrın 20-dək Suriyanı tərk etməsi və ya Rusiya ordusuna qoşulması barədə göstəriş vermişdi. İran adətən Suriya ərazisində qüvvələr və silahların daşınması üçün Suxna yolundan istifadə edir ki, bu da mövqelərin doldurulması ilə daha da asanlaşdırıla bilər. İran iqtisadi fayda əldə etmək üçün Suriyanın mərkəzi səhrasında əvvəllər “Vaqner” qüvvələrinin tutduğu digər mövqelərə də nəzarəti ələ keçirə bilər. Bu mövqelərin bəzilərində "Vaqner"in qoruduğu qaz və neft yataqları var”, deyə hesabatda bildirilir.
Eyni zamanda, analitiklər qeyd edirlər ki, Suriyada hələ də əvvəllər “Vaqner”in nəzarətində olan bir neçə mövqe var - qaz və neft yataqları.
Qeyd edək ki, avqustun 27-də Rusiya Müdafiə Nazirliyi Suriyadakı “Vaqner” yaraqlılarına ölkəni tərk etmək və ya Rusiya Silahlı Qüvvələrinə qoşulmaq əmri verib. Həmin vaxt Suriyada 1500-dən çox “vaqnerçi” olub və daha 3000-ə yaxın ölkə vətəndaşı qrupda işləyib.
Poliqon.info