Dövlət Bahçeli: "Ülkü Ocaqları Şuşada məktəb tikəcək"

Türkiyənin Millətçi Hərəkat Partiyasının sədri Dövlət Bahçeli Azərbaycanın işğaldan azad olunmuş Şuşa şəhərində ibtidai məktəb inşa etməyi planlaşdırır.

“Report” xəbər verir ki, bunu partiya sədri tvitter səhifəsində yazıb.

“Ötən ilə öz damğasını vuran, milli könülləri sevincə boğan Qarabağ zəfəri türk millətinin son illərdə əldə etdiyi ən görkəmli, dastanvari uğurlarından biridir. Bu çərçivədə Qarabağın əbədi Azərbaycan yurdu olduğu təsdiqlənib, əsarət zəncirləri sökülüb atılıb.

Qarabağın döyünən ürəyi Şuşanın 2020-ci il noyabrın 8-də zülmdən xilas edilməsi müqaviməti qıraraq Ermənistan terror dövlətinin şikəst xəyallarını puça çıxarıb. Strateji mövqeyi ilə yanaşı, Şuşa türk mədəniyyəti və tarixinin simvoludur.

Azərbaycan sənət və fikir aləminin qaynaqlarından biri olan Şuşanın inkişafı və burada yaşayan türk uşaqlarının gələcəyi ilə bağlı hamımız mənəvi məsuliyyət daşıyırıq. Xüsusilə bu qədim türk şəhərinin təhsil həyatına dəstək vermək boynumuzun borcudur.

İşdir, Prezidentimiz cənab Rəcəb Tayyib Ərdoğanın icazəsi olarsa, Azərbaycan Prezidenti cənab İlham Əliyev də uyğun görərsə, birbaşa tapşırığımla Ülkü Ocaqları Təhsil və Mədəniyyət Vəqfi tərəfindən Şuşada doqquz siniflik ibtidai məktəbin inşası əsas hədəfimizdir. Bu məsələdə malik olduğumuz bütün imkanlar səfərbər ediləcək və lazımi bütün tədbirlər görüləcək

Azərbaycanın Milli Himni 1920-ci il yanvarın 30-da qəbul edilib. Sözlərinin müəllifi Əhməd Cavad, bəstəkarı isə Şuşa doğumlu mərhum Üzeyir Hacıbəylidir. İnşasını arzuladığımız ibtidai məktəbin Üzeyir Hacıbəylinin adını daşıması, təməl atma mərasiminin isə qarşımızdakı 30 yanvar tarixində keçirilməsi mümkündür.

Təhsil bir millətin gələcək məşəlidir. Bu məşəlin varlığı nəsillərin şüurla yetişib, əxlaqlı böyüməsinə gətirib çıxaracaq. Sivilizasiyaların beşiyi doğru fikirdir və hər doğru fikir onu daşıyacaq beyinə və könülə sahib olanlarla birgədir.

Xüsusilə qeyd edirəm ki, Şuşanın susadığı təhsilə dəstək vermək bizim fikir və inanc borcumuzdur.

Farabi deyib ki, düşünmək ruhun özü ilə danışmasıdır. O ruh ki, türkün ruhudur. O düşüncə ki, türk istiqlalının memarıdır. Çox yaşa Şuşa, çox yaşa Qarabağ, çox yaşasın Türkiyə-Azərbaycan qardaşlığı”, - MHP sədri vurğulayıb.

pia.az