Bu bəyannəmə ilə Vaşinqton və London Rusiyaya qarşı nüvə enerji tərəfdaşlığına başlayır...
Böyük Britaniya və ABŞ Rusiyanı qlobal nüvə enerjisi bazarından sıxışdırmaq məqsədi ilə mülki sahədə yeni nüvə tərəfdaşlığı bağlayıb.
Poliqon xəbər verir ki, bu barədə Böyük Britaniyanın Baş naziri Rişi Sunakın və Ağ Evin mətbuat xidmətlərinin iyunun 8-də yaydığı press-relizdə deyilir.
Sənəddə deyilir ki, “Atlantik Bəyannaməsi”ndə bundan başqa daha bir neçə mövqedə iki ölkənin əməkdaşlığını nəzərdə tutur.
“Kritik təmiz enerji sənayesini, karbon neytrallığına nail olmaq və Rusiyanı qlobal mülki nüvə enerjisi bazarından kənarda saxlamaq ambisiyalarımızı dəstəkləmək üçün Böyük Britaniya və ABŞ yeni mülki nüvə enerjisi tərəfdaşlığına başlayacaqlar”, deyə yayılan press-relizdə bildirilir.
Ağ Evdə çıxış edən Sunak bildirib ki, Rusiya və Çin Qərb ölkələrini təmiz enerjiyə çıxış imkanından məhrum edə bilməyəcək.
“Çin və ya Rusiya kimi ölkələr bizim açıqlığımızı manipulyasiya etmək və ya istismar etmək, əqli mülkiyyətimizi oğurlamaq, texnologiyadan avtoritar məqsədlər üçün istifadə etmək və enerji kimi kritik resurslara çıxışı qadağan etmək istəyir. Onlar qalib gəlməyəcəklər”, deyə Sunak bildirib.
Qeyd edək ki, Sunak və Bayden iyunun 8-də Ağ Evdə görüşdülər və “Atlantik Bəyannaməsi”ni imzalayıblar.
Poliqon.info