“The Washington Post” qəzeti dünyada koronavirusa qarşı milyonlarla doza vaksinin istifadə müddətinin tezliklə bitəcəyini yazır. Məsələn, Niderlandın Leyden şəhərində bir hökumət binasının soyuducusunda minlərlə dollarlıq “AstraZeneca” vaksininin müddəti avqustda qurtarır.
Leyden Universiteti Tibbi Mərkəzinin həkimi Denis Muk-Kanamori bunu faciəvi sayır. Onu ən çox incidən isə Niderland hökumətinin bu dozaları xaricə göndərməməsidir. Muk-Kanamori və həmkarları ötən ay 600 doza vaksini atıblar. Avqustun sonuna 8 min dozanı tullaya bilərlər. Heç nə dəyişməsə, oktyabradək 10 min civarında doza zibilliyə gedəcək. Həkimlər Niderlandda 200 min “AstraZeneca” dozasının oxşar tale ilə üzləşdiyini deyirlər.
Amma Afrikada ötən ay əhalinin cəmi 2.2 faizinə azı bir doza vurulmuşdu. Niderlandda isə əhalinin yarıdan çoxu peyvəndlənib. Hökumət vaksin dozalarının hüquqi və logistik səbəblərdən ixrac olunmayacağını bildirib.
İsraildə iyulun sonuna 80 min doza “Pfizer-BioNTech”, Polşada müxtəlif istehsalçıların hazırladığı 73 min doza atılıb. Slovakiya Rusiyaya 160 min doza istifadə müddəti bitmək üzrə olan “Sputnik V” vaksinini qaytarıb. ABŞ-da təkcə Şimali Karolinada 800 min dozanın vaxtı bitir.
Dünya Səhiyyə Təşkilatı avqustun 9-dək Afrikadan 470 minə yaxın dozanın vaxtının bitdiyini bildirir. Bəzi vaksin dozalarının qiymətinin 20 dollara yaxın olduğunu nəzərə alsaq, itki onmilyonlarla dollarla ölçülür.
Vaksinlərin istifadə müddətinin tez bitməsinin bir səbəbi onların tez xarab olması, yəni “Tamiflu” kimi illərlə saxlanmasının qeyri-mümkünlüyüdür. Corctaun Tibb Məktəbindən Cesse Qudman deyir ki, dozaların vaxtı keçdikcə, eyni immun reaksiyası yaratmaya bilərlər. “Pfizer” və “Moderna” kimi vaksinlər saxlanma müddəti baxımından daha həssasdırlar.
pia.az