Yanvar ayında adambaşına düşən gəlir azalıb?

“Bu qərarlar mart-aprel aylarında ciddi şəkildə gəlirlərin artmasına təsir göstərəcək”.

Bu sözləri iqtisadçı Natiq Cəfərli bu ilin yanvar ayında orta aylıq əmək haqqının göstəricilərində baş verməyən dəyişikliyinin səbəbini şərh edərkən PİA.AZ-a açıqlamasında qeyd edib.

İqtisadçı-eskpert Nemət Əliyev 2019-cu ilin yanvar ayında əhali gəlirlərinin adambaşına düşən həcminin azalması ilə bağlı düşüncələrinə yerli mətbuatda bölüşüb. O, qeyd edib ki, 2019-cu ilin yanvar ayında əhali gəlirlərinin adambaşına düşən həcmi 11 manat 70 qəpik və ya 3% azalıb.

Müəllif açıqlanan rəsmi məlumatlara əsasən bildirir ki, adambaşına düşən gəlirlərin nominal həcmi 2018-ci ilin yanvarında 396,9 manat, 2019-cu ilin yanvarında isə 385,2 manat olub: “Bir aylıq gəlirlərin 11,7 manat və ya 3% azalması ortadadır [(385,2-396,9=-11,7); (-11,7:396,9∙100≈-3%)]. Amma DSK açıqladığı rəsmi məlumatda bu azalmanı ört-basdır etmək üçün onu “5,3% artım” şəklində ötürüb ictimaiyyətə”, deyə əlavə edib.

Maraqlıdır ki, iqtisadçı ekspert Nemət Əliyevin bu iddiası nə dərəcədə doğrudur? Əgər Dövlət Statistika Komitəsi yanlışlığa yol veribsə, o zaman adambaşına düşən gəlirin azalmasının səbəbləri nəylə bağlı ola bilər?

Mövzu ilə bağlı PİA.AZ-ın əməkdaşı iqtisadçı Natiq Cəfərlinin fikirlərini öyrənib.

Natiq Cəfərli: “Minimum əmək haqqı ilə bağlı son qərarlar hələlik orta aylıq əmək haqqına yansımayıb”.

Minimum əmək haqqı və sosial müavinətlə bağlı qəbul edilən qərarın göstəricilərin mart-aprel aylarında özünü göstərəcəyini vurğulayan iqtisadçı Natiq Cəfərliyə görə, yeni qərarların müsbət təsirləri gözləniləndir:

“Çox güman ki, burada söhbət orta aylıq əmək haqqının həcmindən gedir. Minimum orta aylıq əmək haqqı ilə bağlı son qərarlar hələlik əmək haqqına yansımayıb. Çünki bu qərarlar sonradan verilib. Hesab edirəm ki, Nemət bəy orta gəlirlilik səviyyəsini nəzərdə tutub.

Əslində real gəlirlərin artımında ciddi irəliləyişin olacağı gözlənilir. Çünki minimum əmək haqqı, sosial müavinətlərin artımı ilə bağlı qərarlar yeni verilib. Bu qərarlar mart-aprel aylarında ciddi şəkildə gəlirlərin artmasına təsir göstərəcək.

Mart-aprel aylarında yeni statistik göstəricilərdə həmin müsbət təsir özünü biruzə verəcək. Yanvar ayı ilə bağlı rəqəmlər ona görə fərqlidir ki, artımlar hələlik maaşlara yansımayıb”.

Gülşən ŞƏRİF
pia.az