Rusiya müdafiə naziri Müdafiə Nazirliyinin kollegiya iclasında bildirib ki, Rusiya sülhməramlı qoşunları Qarabağda sülhün əsası və qarantı olmaqda davam edir...
Politoloq: “Rusiya hərbçiləri “minaların təmizlənməsi” mövzusu adı altında Azərbaycanda daha uzun müddət qalmaq istəyirlər”.
“Kremlə elə gəlir ki, ehtiyac olmadığı halda Rusiya sülhməramlıları Qarabağı tərk etməməlidirlər. Ancaq Kremlin bunu əsaslandırmaq üçün arqumenti zəifdir”.
Xəbər verdiyimiz kimi, Rusiya müdafiə naziri Sergey Şoyqu prezident Vladimir Putinin də iştirak etdiyi Müdafiə Nazirliyinin kollegiya iclasında bildirib ki, Rusiya sülhməramlı qoşunları Qarabağda sülhün əsası və qarantı olmaqda davam edir. Rusiya Müdafiə Nazirliyi isə fərqli bir açıqlama yaymışdı. Açıqlamada Rusiyanın Qarabağdakı sülhməramlılarının komandanlığı ərazinin minalardan təmizlənməsinə dair razılıq əldə etmək üçün Azərbaycan tərəfi ilə danışıqlar apardığı bildirilib.
Əgər Sergey Şoyqunun sözlərindən çıxış edərsək, Rusiya sülhməramlı qoşunları Qarabağda hansı sülhün “qarantı” olaraq çıxış edir? Ümumiyyətlə, bu açıqlama nədən xəbər verir və bu, rusiyalı sühməramlıların Qarabağda qalma müddətini uzatmaq cəhdi kimi dəyərləndirilə bilərmi?
Rusiyanın yeni sülhməramlı planını Poliqon-un əməkdaşı “Atlas” Araşdırmalar Mərkəzinin rəhbəri Elxan Şahinoğlu ilə müzakirə edib.
Elxan Şahinoğlu: “Minaların təmizlənməsində təcrübəsi olmayan Qarabağdakı rusiyalı hərbçilərin bu çalışmalarda Azərbaycana necə yardımçı olacaqları sual doğurur”.
Azərbaycanın razılığı olmadan heç bir ölkənin və təşkilatın silahlı qüvvələrinin Qarabağa daxil ola bilməyəcəyini vurğulayan politoloq Poliqon-a bildirib ki, Rusiya sühməramlılarının Qarabağı tərk etməsini istədiyimiz kimi, Azərbaycana qarşı ədalətsiz mövqe sərgiləyən ölkə və təşkilatların bölgəmizə daxil olmasını da istəmirik:
“Şoyqunun fikirlərində ziddiyət var. Qarabağda sülh bərpa edilib və Şoyqunun təbirincə desək, Azərbaycanın kənar “qaranta” ehtiyacı yoxdur. Buna baxmayaraq, Kremlə elə gəlir ki, ehtiyac olmadığı halda Rusiya sülhməramlıları Qarabağı tərk etməməlidirlər. Ancaq Kremlin bunu əsaslandırmaq üçün arqumenti zəifdir.
Qarabağda minaları təmizləmək üçün uzun illər lazımdır. Deməli, Rusiya hərbçiləri “minaların təmizlənməsi” mövzusu adı altında Azərbaycanda daha uzun müddət qalmaq istəyirlər. Azərbaycanda minaların təmizlənməsiylə ANAMA (Azərbaycan Respublikası Ərazilərinin Minalardan Təmizlənməsi üzrə Agentlik) təşkilatı məşğuldur. Bu təşkilat minaların təmizlənməsinə yerli vətəndaşları cəlb edib və onlara aylarla xüsusi kurs keçilir. Bu səbəbdən minaların təmizlənməsində təcrübəsi olmayan Qarabağdakı rusiyalı hərbçilərin bu çalışmalarda Azərbaycana necə yardımçı olacaqları sual doğurur.
Elxan Şahinoğlu: “Bu işə rusiyalı sülhməramlıların deyil, Rusiyada bu işdə təcrübəsi olan mütəxəsisislərin Azərbaycana göndərilməsi faydalı olardı”.
Azərbaycan Qarabağda minaların təmizlənməsində ölkəmizə dəstək verən, avadanlıqlar göndərən, təcrübəsiylə bölüşən hər ölkəyə və təşkilata minnətdardır. Rusiya da bu işdə Azərbaycana yardımçı olarsa, dəstəyə görə minnətdar olarıq, sadəcə bu işə rusiyalı sülhməramlıların deyil, Rusiyada bu işdə təcrübəsi olan mütəxəsisislərin Azərbaycana göndərilməsi faydalı olardı.
Rusiyalı sülhməramlıların Azərbaycanda qalmalarının gərəkliyini dəstəkləyən yerli ekspertlər arasında belə bir fikir də var ki, onlar Qarabağı tərk etsələr, bölgədə Fransa, ABŞ və ya beynəlxalq təşkilatlardan birinin sülhməramlıları daxil ola bilərlər ki, bu Azərbaycanın maraqlarına ziddir.
Azərbaycanın razılığı olmadan heç bir ölkənin və təşkilatın silahlı qüvvələri Qarabağa daxil ola bilməz. Rusiya sühməramlılarının Qarabağı tərk etməsini istədiyimiz kimi, Azərbaycana qarşı ədalətsiz mövqe sərgiləyən ölkə və təşkilatların bölgəmizə daxil olmasını da istəmirik”.
Nərminə UMUDLU
Poliqon.info