Şimali Koreya bir ay ərzində beşinci dəfə yarımadanın şərq sahillərinə qanadlı raketlər buraxıb...
Poliqon xəbər verir ki, bu barədə Bloomberg Agentliyi məlumat yayıb.
Cənubi Koreyanın Birləşmiş Qərargah Rəislərinin məlumatına görə, hərbçilər yerli vaxtla səhər saat 9 radələrində Şimali Koreyanın sahil şəhəri Vonsan şəhərinin şimal-şərqindəki sular yaxınlığında bir neçə naməlum qanadlı raket aşkarlayıb.
Qeyd olunur ki, Seul raketin buraxılışını təhlil etmək üçün ABŞ-la birlikdə işləyir.
“Hərbçilərimiz müşahidə və sayıqlığı artırarkən Birləşmiş Ştatlarla sıx əməkdaşlıq edir və Şimali Koreyadan əlavə işarələr və hərəkətləri yaxından izləyir”, deyə məlumatda bildirilib.
Qeyd edilir ki, yanvarın ortalarından bəri Pxenyan daha dörd belə qanadlı raket buraxılışı həyata keçirib. Bu sınaq buraxılışları içində sualtı qayığı təchiz etmək üçün nəzərdə tutulmuş yeni model ballistik raket də olub.
Bloomberg-in məlumatına görə, Şimali Koreya lideri Kim Çen In gücünü və lazım gələrsə, region ölkələrinə zərbə endirməyə hazır olduğunu nümayiş etdirmək üçün raket sınaqlarından istifadə edir.
Qeyd edək ki, bundan əvvəl Kim Çen In Cənubi Koreyanı məhv etməyə qanuni haqqı olduğunu bildirib. Onun sözlərinə görə, Pxenyan bunu edə bilər, çünki Seul onun əməkdaşlığı bərpa etmək cəhdlərini rədd edib.
Poliqon.info