Rusiya və Səudiyyə Ərəbistanı neft və qaz hasilatında tərəfdaşlığın genişləndirilməsinin vacibliyi barədə razılığa gəliblər...
Tərəflər müdafiə sahəsində əməkdaşlığı gücləndirməyi və terrorizmlə mübarizə üçün zəruri məlumat mübadiləsini qurmağı öhdəsinə götürüblər.
Poliqon xəbər verir ki, birgə bəyanat Kremlin saytında dərc olunub. Sənəddə qeyd edilir ki, tərəflər neft-qaz sənayesində qarşılıqlı əlaqələrin genişləndirilməsinin vacibliyini vurğulayıblar. Tərəflər həmçinin nüvə enerjisindən dinc məqsədlərlə istifadə və “yaşıl” enerji sahəsində tərəfdaşlığı da müzakirə ediblər.
Rusiya və Səudiyyə Ərəbistanı qarşılıqlı maraq doğuran məsələlər üzrə mövcud təhlükəsizlik əməkdaşlığını və koordinasiyanı gücləndirmək istəklərini də təsdiqləyiblər. Bundan sonra terror təşkilatlarına qarşı mübarizə məqsədilə ölkələr arasında məlumat mübadiləsi ediləcək.
Bundan əlavə, transsərhəd korrupsiya cinayətlərinə qarşı səmərəli mübarizə üçün beynəlxalq əməkdaşlığın gücləndirilməsi və müvafiq idarələr arasında koordinasiyanın yaradılması nəzərdə tutulur.
Qeyd edək ki, Rusiya prezidenti Vladimir Putin dekabrın 6-da Səudiyyə Ərəbistanının paytaxtı Ər-Riyada səfər edib. Rəsmi səfər çərçivəsində o, vəliəhd şahzadə Məhəmməd bin Salman Əl Səud ilə görüşüb. Elə həmin gün prezident BƏƏ-yə də səfər edib.
Poliqon.info