Rusiya müxalifəti Brüsseldə bir masa arxasında toplaşmağa çalışacaq...

İyunun əvvəlində Brüsseldə Rusiyanın bütün əsas müxalifət qüvvələrinin dəvət olunduğu dəyirmi masa keçiriləcək.

Poliqon xəbər verir ki, bu barədə Rusiyanın müxalifətyönlü “Aqentstvo” nəşri məlumat yayıb.

Nəşrin məlumatına görə, Avropa Parlamentinin himayəsi altında keçirilən forumun yekununda Rusiya demokratik qüvvələri üçün birgə fəaliyyət planının elan edilməsi planlaşdırılır. Lakin böyük ehtimalla Aleksey Navalnının tərəfdaşları dəyirmi masada iştirak etməyəcəklər.

Foruma dəvətlərə əsasən, Avropa Parlamenti və Rusiya müxalifətinin “Brüssel dialoqu” dəyirmi masası iyunun 5-6-da keçiriləcək. Dəyirmi masa Rusiyanın demokratik qüvvələrini və Aİ siyasətçilərini bir araya gətirən tədbir kimi nəzərdə tutulub. Forum iştirakçıları Rusiya siyasətçilərinin ölkəni demokratiyaya qaytarmaq strategiyasını və bu transformasiyaya dəstək verə biləcək Aİ-nin hərəkətlərini müzakirə etməlidirlər. Digər məsələlərə transformasiyadan sonra tələb olunacaq islahatlar və “Rusiyada bərpa edilmiş parlament demokratiyasının sabitləşməsi” planı daxildir.

Forum proqramda “Rusiyada demokratiya naminə birgə fəaliyyət planının elanı” adlı tədbirlə yekunlaşacaq.

Navalnıya bağlı olan FBK-dan Mariya Pevçix, Lyubov Sobol və Ruslan Şaveddinov, keçmiş iş adamı Leonid Nevzlin, siyasətçilər Qarri Kasparov, Gennadi Qudkov, Mixail Xodorkovskinin “Açıq Rusiya Fondu”nun nümayəndəsi Mariya Loqan, jurnalist Yuri Dud, Meduza-nın baş direktoru Qalina Timçenko Dəyirmi Masaya dəvət alıblar. Aİ strukturlarından Dəyirmi Masada Avropa parlamentariləri Andrius Kubilius (Litva), Sergey Laqodinski (Almaniya), Vlodzimierz Çimoşeviç (Polşa), Bernard Guetta (Fransa) iştirak edəcək. Ümumilikdə Dəyirmi Masaya təxminən 200 nəfər qatıla bilər. Mixail Xodorkovskinin də konfransda iştirak etməyi planlaşdırır.

Forumun əsas məqsədinin Rusiya müxalifətinin bütün fraksiyalarını bir masa arxasında toplamaq fürsəti kimi dəyərləndirilir. Dəyirmi Masanın ilk günü məhz bu məsələyə həsr olunacaq. İkinci gün Rusiya müxalifəti ilə Avropa institutları arasında dialoqun keçirilməsi planlaşdırılır.

Xodorkovskinin mətbuat katibi Maksim Dbar bildirib ki, sammitin yekunları üzrə birgə sənədi prioritet məsələ hesab etmir: “Mənim nöqteyi-nəzərimdən biz hələ bu mərhələyə çatmamışıq”, deyə Dbar bildirib. Bununla belə, o, etiraf edir ki, Avropa Parlamentindən olan digər həmkarları üçün birgə bəyanat mühüm sənəd ola bilər. “Bizim üçün mühüm vəzifə müxalifətin müharibə əleyhinə düşərgəsindəki həmkarları ilə bir sıra konkret məsələlərdə koordinasiya üzrə razılaşmaqdır”, deyə Xodorkovskinin mətbuat katibi vurğulayıb.

FBK nümayəndələrinin dəvəti qəbul edib-etməyəcəyi barədə məlumatı yoxdur. FBK-dan bildiriblər ki, fond nümayəndələri böyük ehtimalla görüşdə iştirak etməyəcəklər. FBK-nın mətbuat katibi Kira Yarmış Brüssel görüşündə iştirak etmək planlarından xəbərsiz olduğunu bildirib.

FBK nümayəndələri aprelin sonunda Berlində Mixail Xodorkovskinin iştirakı ilə keçirilən müxalifətin qurultayında da iştirak etməyiblər. Onlar da qurultayın yekunlarına dair birgə bəyannamənin altına imza atmaqdan da imtina ediblər.

“Mən bu işdə FBK-nın motivlərini başa düşürəm”, deyə politoloq Abbas Qalyamov bildirib. “Fond Rusiya müxalifətinin ən döyüşə hazır hissəsidir və bu mənada onun itirəcəyi nəsə var. Navalnının bir çox tərəfdarları, yumşaq desək, Berlinə toplaşan insanların “yaradıcılığının” pərəstişkarı deyillər, ona görə də onlarla bir sırada dayanmağın tərəfdarlarının məyusluğu ilə üzləşəcəyindən ehtiyat edirlər”.

Qeyd edilir ki, Brüsseldə keçiriləcək foruma hazırlıq Navalnı və Xodorkovski arasında gərginləşən qarşıdurma fonunda aparılır. Aprelin ortalarında Navalnı həbsxanadan, “Mən Mixail Xodorkovskidən utanıram” sözləri ilə başlayan yazı yazıb. Bu yazı Başqırdıstanda uzun müddət hakimiyyətlə əməkdaşlıq edən və 2021-ci ildə Rusiyanı tərk edərək Xodorkovskinin maliyyələşdirdiyi YouTube kanalında aparıcı olmuş keçmiş başqırdlı PR adamı Rostislav Murzaqulova həsr olunub. Navalnı onun Ufadakı qərargahının keçmiş rəhbəri Liliya Çanışeva üçün yazıb ki, “desant bazası” hazırlayan şəxslə əməkdaşlığı qəbuledilməz hesab edir.

“Müharibə cinayətləri törətməyən, işgəncə və qətllərdə əli olmayan, rejimə qarşı döyüşməyə hazır olan və müharibənin aqressiv olduğunu, müharibəni başlatan rejimin cinayətkar olduğunu, 1991-ci ilin sərhədləri daxilində Ukraynanı tanıyan hər kəsə əl uzatmağa hazıram”, deyə Navalnıya cavab olaraq Xodorkovski öz Twitter səhifəsində yazıb və müxalifətçini birləşməyə dəvət edib.

Xodorkovskinin keçmiş biznes ortağı Nevzlin Navalnının tərəfdarlarına qarşı daha sərt danışıb. O, Facebook-da Navalnının tərəfdarlarını Xodorkovski ilə birləşmək istəmədiklərinə görə tənqid edib.

Poliqon.info