Ağ Ev: ABŞ İsrailə Rəfah əməliyyatına alternativ təklif edib

Poliqon xəbər verir ki, bunu Ağ Evin mətbuat katibi Karine Jan-Pyer bildirib.

Eyni zamanda ABŞ Milli Təhlükəsizlik Şurasının strateji kommunikasiyalar üzrə koordinatoru Con Kirbi də bildirib ki, İsrailin Qəzza zolağının Rəfah şəhərindəki hərbi əməliyyatı yalnız Fələstinin HƏMAS hərəkatının danışıqlar masasında mövqeyini gücləndirəcək.

Karine Jan-Pyer Vaşinqtonun təklif etdiyi alternativlər barədə ətraflı məlumat verməsə də, əmin edib ki, bu mövzu müzakirə olunur.

“Biz HƏMAS-ı məğlub etmək üçün böyük quru əməliyyatı keçirməyi nəzərdə tutmayan alternativ üsullar təklif etdik. İsrail hökuməti ilə bu danışıqlar davam edir”, deyə xanım Jan-Pyer brifinqdə bildirib.

Kirbi isə deyib ki, ABŞ İsrailə HƏMAS liderlərinin izinə düşməyə kömək edir. Eyni zamanda, amerikalı rəsmi ABŞ-ın radikallarla mübarizədə İsrailə konkret olaraq necə kömək etdiyini təfərrüatlarına verməkdən imtina edib.

Poliqon.info