“Altun-kitab” nəşriyyatının direktoru, dilçi-alim Rafiq İsmayılov yaxın günlərdə işindən ayrılacaq.
Bu barədə Bizim.Media-ya dilçi-alimin özü açıqlama verib.
Onun sözlərinə görə, artıq dərsliklə bağlı fəaliyyətdən yorulub:
“Təhsil Nazirliyinin dəvəti ilə yeni nəsil dərsliklər üzərində işləyirəm. Amma yorulmuşam. Çox naşükür, əziyyətli işdir və bəhrəsini də görmürsən. Bir dəfə də bu işimdən kənarlaşmaq istəmişəm. Amma israrla saxlayıblar. Azərbaycan Dövlət Nəşriyyatında çoxlu maraqlı işlər var. İstəyirəm ki, o işlərlə məşğul olum və oranı inkişaf etdirim. Yaxın zamanda dərslik işimdən ayrılacağam”, - deyə Rafiq İsmayılov qeyd edib.
Qeyd edək ki, Rafiq İsmayılov 2004-cü ildən yeni nəsil dərsliklər üzərində çalışır. O, həmçinin zaman-zaman Azərbaycan dilinin orfoqrafiya lüğətindəki yanlışlıqları ortaya çıxaran dilçi-alim kimi də yadda qalıb.
Ən son isə “Azərbaycan dilinin orfoqrafiya lüğəti”ndən “hörümçək” sözünün çıxarılaraq “spayder” ifadəsi ilə əvəz edilməsi məsələsini ortaya atmışdı.
Son günlər isə naşir şair Qəşəm Nəcəfzadə ilə qalmaqallarla gündəmə gəlmişdi. Qəşəm Nəcəfzadə onu dərslikləri bərbad hala salmaqda və vəzifəsindən sui-istifadədə ittiham etmişdi.
pia.az