Orban Zelenski ilə danışıqlardan sonra Moskvada Putinlə görüşəcək

Poliqon xəbər verir ki, bu barədə Financial Timesnəşri bir macar və iki avropalı rəsmiyə istinadən məlumat yayıb.

Rusiya prezidentinin mətbuat katibi Dmitri Peskov Macarıstanın baş nazirinin Moskvaya səfəri ilə bağlı məlumatı nə təsdiq, nə də təkzib edərək bildirib ki, Vladimir Putinin cümə günü planlaşdırılan “çox məşğul qrafiki” var.

FT Viktor Orbanın Moskva və Kiyev arasında danışıqlarda vasitəçi kimi çıxış etmək niyyətində olduğunu bildirib.

“Məncə, onun strategiyası hər iki tərəfi dinləməkdir”, deyə qəzetin mənbələrindən biri bildirib.

Macarıstanlı jurnalist Szabolcs Pani X hesabında bildirib ki, Macarıstanın xarici işlər naziri Peter Siyyarto Viktor Orbanla birlikdə Moskvaya gedəcək.

Avropa Şurasının rəhbəri Çarlz Mişel X hesabında yazıb ki, Macarıstanın Aİ adından Rusiya ilə danışıqlar aparmaq səlahiyyəti yoxdur.

“Ukrayna ilə bağlı heç bir danışıqlar Ukraynasız baş tuta bilməz”, deyə Mişel əlavə edib.

Qdyd edək ki, iyulun 1-dən Macarıstan altı ay müddətinə Aİ Şurasına sədrlik edir. İyulun 2-də Viktor Orban Kiyevə gəlib. Vladimir Zelenski ilə danışıqlardan sonra keçirilən mətbuat konfransında Orban bildirib ki, Macarıstanın Aİ Şurasına sədrliyi dövründə Ukraynada sülhün təmin olunması məsələsi növbəti altı ay ərzində əsas məsələ olacaq.

Poliqon.info