İran öz suverenliyini müdafiə etmək hüququndan istifadə etmək üçün heç kimdən icazə istəməyəcək...
Poliqon xəbər verir ki, bunu İran Xarici İşlər Nazirliyinin sözçüsü Naser Kənani deyib.
Bazar ertəsi Böyük Britaniya, Almaniya və Fransa birgə bəyanat yayaraq, İran və onun müttəfiqlərini regional gərginliyi daha da artıra və atəşkəs və girovların azad edilməsi üçün danışıqlar aparmaq imkanını təhlükə altına qoya biləcək hücumlardan çəkinməyə çağırıb.
"İslam Respublikası suverenliyini və milli təhlükəsizliyini qorumaq, regional sabitliyi təşviq etmək və regionda terrorizm və qeyri-sabitliyin əsl mənbəyinə qarşı çəkindirici qüvvə yaratmaq əzmindədir və ayrılmaz hüquqlarını qorumaq üçün heç kimdən icazə istəməyəcək", deyə Kənani bildirib.
Onun sözlərinə görə, Avropa üçlüyü "sionist rejimin beynəlxalq cinayətləri ilə bağlı bir damcı belə etirazı ehtiva etməyən bəyanatda həyasızcasına İrandan onun suverenliyi və ərazi bütövlüyünü pozan rejimə qarşı cavab tədbirləri görməməsini tələb edir".
"Əgər bu ölkələr həqiqətən də regionda sülh və sabitlik üçün çalışırlarsa, heç bir qeyd-şərtsiz İsrail rejiminin təxribatlarına və münaqişənin qızışdırılmasına qarşı çıxmalı, Qəzza zolağına qarşı müharibəni dərhal dayandırmalı, uşaqların, qadınların və müdafiəsiz fələstinlilər dəhşətli qətllərinə son qoymalıdırlar", deyə iranlı diplomat bildirib.
Qeyd edək ki, iyulun 31-də Fələstinin HƏMAS hərəkatı hərəkatın Siyasi Bürosunun rəhbəri İsmayıl Haniyənin İranın yeni prezidentinin andiçmə mərasimində iştirak etmək üçün gəldiyi Tehrandakı iqamətgahına İsrailin endirdiyi zərbə nəticəsində öldüyünü elan edib. Hərəkat Haniyənin ölümündə İsrail və ABŞ-ı günahlandırıb, hücumun cavabsız qalmayacağını bildirib.
Poliqon.info