Ukraynanı irimiqyaslı korrupsiyaya görə NATO-da görmək istəmirlər

Poliqon xəbər verir ki, bu barədə Britaniyanın The Daily Telegraph qəzeti ABŞ Dövlət Departamentinin yüksək rütbəli rəsmisinə istinadən məlumat yayıb. Qəzet yazır ki, NATO üzvü olan ölkələr Ukraynanı alyansa qoşulmağa dəvət etmək istəmirlər, çünki ölkədə irimiqyaslı korrupsiya tüğyan edir.

“Biz bir addım geri çəkilməli və Ukraynanın son iki ildə islahatlar adı altında gördüyü hər şeyi qeyd etməliyik”, deyə adının açıqlanmasını istəməyən mənbə nəşrə bildirib.

Mənbənin sözlərinə görə, nə qədər ki, Kiyev bu islahatları həyata keçirməkdə davam edir, onlar tərifə layiqdirlər. Eyni zamanda mənbə əlavə edib ki, Ukrayna liderləri ilə xüsusilə korrupsiyaya qarşı mübarizədə atılmalı olan əlavə addımlar barədə danışmaq lazımdır.

“Bu, bir çoxumuz üçün prioritet mövzudur”, deyə Dövlət Departamentinin rəsmisi vurğulayıb.

Xatırladaq ki, 2022-ci ilin sentyabrında Kiyev Şimali Atlantika Alyansına sürətləndirilmiş şəkildə qoşulmaq üçün ərizə təqdim edib. Lakin alyansa üzv ölkələrin liderləri arasında Ukraynanın öz sıralarına qəbul edilməsinin zəruriliyi ilə bağlı birlik yoxdur.

Poliqon.info