Ukrayna NATO silahları ilə Rusiyadakı hədəfləri vuracaq... - Putinin təhdidləri nə olacaq?

Hərbi-ekspert: “Ukraynaya Rusiya ərazilərində olan leqal hərbi hədəflərə NATO silahları ilə zərbə endirmək imkanının təqdim edilməsi kifayət qədər gecikmiş addımdır”.

“Məhdud miqyasda Rusiya ərazisindəki hədəflərin məhv edilməsi Ukrayna ilə müharibədə ciddi dəyişikliklərlə və müharibənin gedişatında sərt döngələrə gətirib çıxarmayacaq”.

Bu sözləri hərbi-ekspert Ədalət Verdiyev Ukraynaya NATO silahlarından istifadəyə icazə verilməsinin nəticələrini Poliqon-a şərh edərkən qeyd edib.

Artıq Ukrayna Rusiya ərazilərində olan leqal hərbi hədəfləri NATO üzvlərindən aldığı silahlarla vurmaq imkanı əldə edib. Son məlumatlara görə isə Ukrayna ordusu öz mövqelərini möhkəmləndirməyə başlayıb.

Bəs, Qərb silahları ilə Rusiya ərazilərinin vurulması Putinin iddia etdiyi kimi böyük eskalasiyaya və nüvə müharibəsi təhlükəsinə yol aça bilərmi?

Ukrayna-Rusiya müharibəsinin indiki mərhələsini Poliqon-un əməkdaşı hərbi-ekspert Ədalət Verdiyev ilə müzakirə edib.

Ədalət Verdiyev: “Bu zərbələr Rusiyanı daha da qıcıqlandıracaq”.

Rusiyanın bu durumda nüvə silahlarından istifadə etmək üçün əsaslarının olmayacağını bildirən ekspert Poliqon-a açıqlamasında qeyd edib ki, Rusiya bir dövlət olaraq iflas təhlükısi qarşısında olduğu, ya da əraziləri işğaıa məruz qaldığı təqdirdə nüvə silahına əl ata bilər:

“Ukraynaya Rusiya ərazilərində olan leqal hərbi hədəflərə NATO silahları ilə zərbə endirmək imkanının təqdim edilməsi kifayət qədər gecikmiş addımdır. İlk növbədə Ukraynada belə uzaq məsafələrə zərbə endirmək üçün silah və sursatlarən sayı kifayət qədər məhduddur. Belə olan halda məhdud miqyasda Rusiya ərazisindəki hədəflərin məhv edilməsi Ukrayna ilə müharibədə ciddi dəyişikliklərlə və müharibənin gedişatında sərt döngələrə gətirib çıxarmayacaq.

Amma bu zərbələr Rusiyanı daha da qıcıqlandıracaq. Lakin əvvələr də belə bir zərbələr, əsasən PUA-lar vasitəsilə endirilib. Amma bu hələlik nüvə müharibəsinin başlanması barədə iddialar irəli sürmək üçün yetərli deyil. Çünki nüvə müharibəsi birtərəfli qaydada olmayacaq. Rusiya da bunu yaxşı anlayır.

Zərbə endirən tərəfin əks zərbələr alma ehtimalını da kifayət qədər yüksək olduğunu nəzərə alsaq, Rusiyanın hələlik belə bir addıma getmək niyyətində olmadığını deyə bilərik. Rusiya bir dövlət olaraq iflas təhlükəsi qarşısında olarsa, ya da əraziləri işğaıa məruz qaldığı təqdirdə nüvə silahına əl ata bilər. Rusiyanın nüvə doktrinasında da nüvə silahından istifadə etmək üçün bu əsaslar yer alıb. Hazırki durumda isə Rusiyanın nüvə silahından istifadə etmək üçün heç bir səbəbi yoxdur. Digər tərəfdən isə təcavüzkar ölkə də məhz Rusiyadır və Rusia raket atəşləri Ukraynanın demək olar ki, bütün şəhərlərini dağıdıb.

Əgər Rusiya müəyyən templərlə işğal fəaliyyətini davam etdirirsə, Ukrayna ərazilərini zəbt etməyə və uğurlarını inkişaf etdirməyə nail olursa, belə bir halda Ukraynanın da müdafiə olunmaq və Rusiyanın atdığı addımlara adekvat cavab vermək hüququ var”.

Nərminə UMUDLU
Poliqon.info