Borqun Bakı səfəri... - Qərb artıq səmimi olaraq regionda sülh yaranmasını istəyir?

Politoloq: “ATƏT sədrinin verdiyi bəyanat artıq problemin olmadığı və onların da belə bir missiyasının qalmadığının göstəricisidir”.

“Problem Azərbaycan tərəfindən öz təşəbbüsü ilə hərbi yolla həll edildikdən sonra ATƏT və onlar kimi fəaliyyət göstərən bütün təşkilatlar artıq getdikcə Ermənistanın xaosa sürətlənməsinin, nəticədə isə bir dövlət kimi yox olmasının qarşısını almaq üçün sülhdə maraqlı görünürlər”.

Bu sözləri politoloq Azər Qasımov ATƏT nümayəndəsinin Bakı səfərini Poliqon-a şərh edərkən qeyd edib.

Dünən Ermənistana səfər edən ATƏT-in fəaliyyətdə olan sədri, Maltanın xarici işlər, Avropa işləri və ticarət naziri Yan Borq bu gün də Azərbaycana səfər edib. Səfər çərçivəsində Azərbaycan Respublikasının Prezidenti İlham Əliyev Borqun başçılıq etdiyi nümayəndə heyətini qəbul edib.

Xatırladaq ki, Ermənistanda mətbuat konfransında Yan Borq bildirib ki, ATƏT artıq Qarabağ münaqişəsi ilə məşğul olmur və onun münaqişə ilə bağlı hər hansı bir rəy bildirməsi ikitərəfli danışıqlara ancaq ziyan vura bilər.

Bəs, heç də həmişə obyektiv və ədalətli ola bilməyən ATƏT-in indi belə bir mövqe sərgiləməsi nədən xəbər verir və hesab etmək olarmı ki, Qərb artıq səmimi olaraq regionda sülh yaranmasını istəyir?

Qərbin Cənubi Qafqaz planını Poliqon-un əməkdaşı politoloq Azər Qasımov ilə müzakirə edib.

Azər Qasımov: “Görünən odur ki, ATƏT sədri konstruktiv mövqe nümayiş etdirmək məcburiyyətində qaldıqlarını etiraf edir və fikir bildirməyi ikitərəfli danışıqlara ziyan vura biləcəyi gerçəyini qəbul edir”.

Tək Qərb yox, bu məsələni geosiyasi mübarizə meydanı kimi görən bütün güclərin sülhdə maraqlı olmadıqlarını vurğulayan politoloq bildirib ki, reallıq Azərbaycan-Ermənistan məsələsinin bağlanmasını tələb edir:

“ATƏT sədrinin verdiyi bəyanat artıq problemin olmadığı və onların da belə bir missiyasının qalmadığının göstəricisidir. Bu, tək ATƏT deyil, bütün beynəlxalq ictimaiyyətin fikridir. Qarabağ məsələsi deyilən qondarma məsələ artıq həll edilib və yoxdur!
Görünən odur ki, ATƏT sədri konstruktiv mövqe nümayiş etdirmək məcburiyyətində qaldıqlarını etiraf edir və fikir bildirməyi ikitərəfli danışıqlara ziyan vura biləcəyi gerçəyini qəbul edir.

Problem Azərbaycan tərəfindən öz təşəbbüsü ilə hərbi yolla həll edildikdən sonra ATƏT və onlar kimi fəaliyyət göstərən bütün təşkilatlar artıq getdikcə Ermənistanın xaosa sürətlənməsinin, nəticədə isə bir dövlət kimi yox olmasının qarşısını almaq üçün sülhdə maraqlı görünürlər. Bu, məsburiyyətdən doğan haldır və real gündəmə əsaslanır. Tək Qərb yox, bu məsələni geosiyasi mübarizə meydanı kimi görən bütün güclər sülhdə maraqlı deyillər. Amma reallıq Azərbaycan-Ermənistan məsələsinin bağlanmasını tələb edir.

Bu, əslində Azərbaycanın gələcəkdə Ermənistanla bağlı Qərbin sonrakı planlarında Azərbaycanın əl-qolunu bağlamaq üçün edilir. Bu sülh Ermənistan əgər Qərbə inteqrasiya edəcəksə və bu zaman Ermənistanı daha da zəiflədəcək hansısa hal olacaqsa, Azərbaycanın bundan istifadə edərək öz planlarını həyata keçirilməsinin qarşısını almaq üçündür. Təbii ki, Azərbaycan öz tarixi torpaqlarından imtina etməməlidir. Müvafiq durumda bundan mütləq istifadə etməlidir”.

Nərminə UMUDLU
Poliqon.info