Kəşfiyyat: Rusiya ABŞ və NATO ilə birbaşa hərbi münaqişə istəmir...

Poliqon xəbər verir ki, bu barədə ABŞ Milli Kəşfiyyatının direktoru Avril Hainesin hesabatında deyilir. Hesabata görə, Rusiya hakimiyyəti ərazilərin əhəmiyyətli hissəsinin qaytarılması üçün Ukraynanın səylərini zəiflətdiyini düşünür.

Konqresdə dinləmələrdə təqdim olunan hesabatda deyilir:

“Rusiya, demək olar ki, ABŞ ordusu və NATO ilə birbaşa hərbi münaqişə istəmir və qlobal miqyasda hərbi münaqişə üçün qırmızı xətt kimi qəbul etdiyi həddən aşağı asimmetrik fəaliyyətlərini davam etdirəcək”, deyə ABŞ Kəşfiyyatının Senata təqdim etdiyi hesabatda bildirilir.

Amerika kəşfiyyatının məlumatına görə, Rusiya hesab edir ki, Qərbin Ukraynaya dəstəyi məhduddur, xüsusən də İsrail və HƏMAS arasındakı müharibə başlayandan sonra bu dəstək hiss olunacaq qədər azalıb.

Hesabatda başqa nə deyilir?

- Rusiya 2023-cü ilin sonundan bəri döyüş meydanında ardıcıl nailiyyətlər əldə edib və Qərbin hərbi yardımının qeyri-müəyyənliyindən faydalanıb. Bu vəziyyət Rusiyaya strateji hərbi üstünlük verir və vəziyyəti getdikcə daha çox Moskvanın xeyrinə dəyişir.

- Rusiya müdafiə sənayesinin artım tempini əhəmiyyətli dərəcədə artırıb, döyüş sursatı və uzaqmənzilli silahların istehsalını qurub. Bu, lazım gələrsə, uzun və gərgin müharibə aparmağa imkan verir.

- Rusiya ilə Çin arasında ticarət artır. İddialara görə, Çin Rusiyaya iqtisadi və təhlükəsizlik yardımı edir, Rusiya müdafiə sənayesi kompleksini, o cümlədən ikili təyinatlı materiallar və silah komponentləri tədarükü ilə dəstəkləyir. Pekin öz iqtisadi və diplomatik maraqlarını riskə atmadan əlaqələri qorumaq üçün dəstək səviyyəsini tənzimləyir. Hesabatda deyilir ki, bunun müqabilində Çin, əlverişli enerji qiymətləri və Arktikaya daha geniş çıxış əldə edir.

- Rusiya öz nüvə imkanlarını təkmilləşdirməyə və “nüvə silahlarının ən böyük və ən müxtəlif arsenalını” saxlamağa davam edəcək. İddialara görə, Moskva nüvə imkanlarını “cəndirməni qorumaq və ABŞ və NATO ilə potensial münaqişədə məqsədlərə nail olmaq üçün zəruri” hesab edir.

- Rusiya nüvə silahı daşıya bilən uzaqmənzilli raketlər və ABŞ-ın raket əleyhinə müdafiə sistemlərini keçmək və ya yan keçmək üçün nəzərdə tutulmuş sualtı sistemlər hazırlamağa davam edəcək. Rusiya nüvə və ya adi döyüş başlıqlarını daşımağa qadir olan qeyri-strateji sistemləri genişləndirir və modernləşdirir.

- Amerika kəşfiyyatına görə, Rusiya qlobal kiber təhlükə yaradacaq və kəşfiyyat və kiberhücum üsullarını təkmilləşdirəcək.

- Amerika kəşfiyyatı hesab edir ki, Rusiya Qərb ittifaqlarını parçalamaq istəyir. Hesabatda Rusiyanın 2024-cü ildə ABŞ-da keçiriləcək seçkilərə təsir göstərməyə çalışacağı ehtimal edilir.

- Rusiya “energetika sektorunda əhəmiyyətli təsir rıçaqlarını” saxlayacaq. Moskva Avropaya ikinci ən böyük qaz tədarükçüsü olaraq qalır. Rusiya Federasiyası dəniz neft ixracının böyük hissəsini uğurla istiqamətləndirə bildi. Çox güman ki, G7-nin müəyyən etdiyi qiymət tavanından yüksək həcmdə karbohidrogenlər satacaq.

Xatırladaq ki, ABŞ kəşfiyyatının 2023-cü ilin mart ayına aid hesabatında da deyilir ki, Rusiya ABŞ və NATO ilə hərbi münaqişəyə səbəb ola biləcək hərəkətlərdən yayınır. Bununla belə, 2024-cü ilin yanvarında NATO-nun hərbi komitəsinin rəhbəri Rob Bauer bildirib ki, alyansın qüvvələri yaxın iyirmi ildə Rusiya ilə genişmiqyaslı müharibəyə hazırlaşır.

Poliqon.info