Qaqauziya muxtariyyəti Moldovadan ayrılmağa hazırlaşmır...

Poliqon xəbər verir ki, bunu "RİA Novosti" Agentliyinə müsahibəsində Qaqauz muxtariyyətinin rəhbəri Yevgeniya Qutsul bildirib.

Qutsul xatırladıb ki, Moldova qanunvericiliyinə görə, bu, yalnız ölkənin müstəqilliyini itirdiyi halda baş verə bilər. Qutsul əlavə edib ki, Qaqauziya ilə rəsmi Kişinyov arasındakı bütün ziddiyyətlər "siyasi müstəvidə"dir və sünidir.

Martın 1-də Qaqauz muxtariyyətinin rəhbəri Rusiyaya işgüzar səfər edib. Siyasətçi Federasiya Şurasının rəhbəri Valentina Matvienko ilə görüşüb. Qutsul senatorla söhbəti zamanı Kişinyovun "qaqauz xalqının hüquqlarına zülm etdiyindən şikayətlənib". Matvienko da öz növbəsində bəyan edib ki, Rusiya muxtariyyətə "kömək etməyə hazırdır".

Qaqauziya Moldovanın cənubundakı muxtariyyətdir və ənənəvi olaraq Rusiya Federasiyasının təsirir altındadır. Kişinyov isə Avropaya inteqrasiya kursunu elan edib.

Bu arada, Moldova parlamentinin sədri İqor Qrosu bildirib ki, Kişinyov 2030-cu ilə qədər Avropa İttifaqına daxil ola bilər. O xatırladıb ki, dövlət başçısı Maya Sandu 2030-cu ilə qədər Aİ-yə daxil olmaq məqsədini açıqlayıb.

"Bu, bizim qarşımıza qoyduğumuz məqsəddir. Mən bu məqsədi dəstəkləyirəm, lakin eyni zamanda həmkarlarıma da dedim və hamıya deyirəm ki, biz bu prosesi sürətləndirməyə çalışacağıq", deyə Qrosu bildirib.

Onun sözlərinə görə, Moldova, Ukrayna və bütün Avropada sürətlənmiş dinamika var - hadisələr çox sürətlə inkişaf edir, 10 il əvvəl belə deyildi:

"Biz bu çətin vəziyyətdə uyğunlaşmalı, imkanlar tapmalıyıq. 2022-ci ildə biz namizəd ölkə statusunu aldıq, 2023-cü ildə isə danışıqlara başladıq".

Dekabrın 24-də Moldova prezidenti Maia Sandu ölkə parlamentinə respublikanın Avropa İttifaqına daxil olması ilə bağlı vətəndaşların rəyini öyrənmək üçün referendum təşkil etmək təklifi ilə çıxış edib. 2023-cü ilin sonunda parlament üzvləri Seçki Məcəlləsinə dəyişiklikləri təsdiqləyiblər ki, ona görə də parlament və prezident seçkiləri günü referendum keçirilə bilər.

Poliqon.info