Britaniya Rusiyaya avadanlıq tədarükçülərinə qarşı sanksiyalar tətbiq edəcək

Poliqon xəbər verir ki, bu barədə Britaniya hökumətinin saytında məlumat verilib.

Açıqlamada deyilir ki, ayrı-ayrı şəxslərə və tədarükçü qruplarına qarşı sanksiyalar Vladimir Putini Ukraynadakı qanunsuz müharibəsi üçün lazım olan resurslardan məhrum etməyə hesablanıb.

"Biz Ukraynaya dəstəyimizdə sadiq qalırıq. Əgər biz Putinin aqressiyasının uğur qazanmasına imkan versək, bu, demokratiyaya meydan oxuyanları və həyat tərzimizi təhdid edənləri cəsarətləndirəcək. Biz onların qalib gəlməsinə imkan verə bilmərik", deyə Böyük Britaniyanın xarici işlər naziri Devid Kemeron bildirib.

O, həmçinin Ukrayna üçün 29 milyon funt-sterlinqlik yeni qış humanitar yardım paketini, habelə Ukraynanın ən həssas təbəqələrinin ehtiyaclarını hədəf alan əlavə 7,75 milyon funt-sterlinqlik humanitar yardımı açıqlayıb.

Böyük Britaniyadan Ukraynaya ümumi hərbi, humanitar və iqtisadi dəstək hazırda 9,3 milyard funt-sterlinq təşkil edir. Ayrılan maliyyə Böyük Britaniyanın 2023-2024-cü illər üçün Ukraynaya 127 milyon funt-sterlinqlik ümumi humanitar yardımının bir hissəsidir.

Həmçinin qeyd edilir ki, bu gün Devid Kemeron "Britaniya-Amerika münasibətlərinin möhkəmliyini və Rusiya təcavüzünə qarşı mübarizədə Ukraynanın dəstəyini təsdiqləmək" üçün ABŞ-a gələcək.

Poliqon.info