Qabil Hüseynli: Overçukun iclasda iştirak etməməsi üçtərəfli müqavilənin tələblərinə zidd ola bilər...

Politoloq: “Ermənistan sərhədlərin delimitasiyası üzrə komissiyaların iclasında Overçukun iştirakını istəmir”.

“Mən ümid edirəm ki, Azərbaycan və Ermənistan arasında yeni açılım ola bilər”.

Bu sözləri politoloq Qabil Hüseynli Ermənistan və Azərbaycan sərhədinin delimitasiyası üzrə komissiyaların gözlənilən iclasını Poliqon-a şərh edərkən qeyd edib.

Noyabrın 30-da Ermənistan və Azərbaycan sərhədinin delimitasiyası üzrə komissiyaların iclası keçiriləcək. Bunu Ermənistan Xarici İşlər Nazirliyinin mətbuat katibi Ani Badalyan deyib və məlumatı Azərbaycan tərəfi də təsdiqləyib. Danışıqlar Azərbaycan-Ermənistan sərhədində baş tutacaq. Ermənistan və Azərbaycan sərhədinin delimitasiyası üzrə komissiyanın üzvü Rusiyanın isə bu görüşdə iştirak edib-etməyəcəyi hələ ki, bəlli deyil.

Komissiyanın Rusiyanın iştirakı olmadan fəaliyyətinə ehtimal vermək olar və bu nümunə Azərbaycan-Ermənistan münasibətləridə yeni səhifə aça bilərmi?

Azərbaycan və Ermənistan arasındakı son münasibətləri Poliqon-un əməkdaşı politoloq Qabil Hüseynli ilə müzakirə edib.

Qabil Hüseynli: “Ermənistan bu məsələləri Azərbaycanla ikilikdə həll etmək istəyir”.

Overçukun iştirak etmədiyi iclası Rusiya qəbul etməyəcəyəini vurğulayan politoloq bildirib ki, Ermənistan bu məsələləri Azərbaycanla ikilikdə həll etmək istəyir:

“Ermənistan və Azərbaycan sərhədinin delimitasiyası üzrə komissiyanın üzvü Rusiya tərəfindən baş nazirin müavini Aleksey Overçukdur. Bu vaxta qədər delimitasiyası üzrə komissiyanın iki iclası keçirilib və hər iki iclasda Overçuk iştirak edib.

İndi Ermənistan sərhədlərin delimitasiyası üzrə komissiyaların iclasında Overçukun iştirakını istəmir. Ermənistan bu məsələləri Azərbaycanla ikilikdə həll etmək istəyir. Overçukun iclasda iştirak etməməsi üçtərəfli müqavilənin tələblərinə zidd ola bilər. Buna görə də, Rusiyanın iclasda iştirak edib-etməyəcəyi dövlətin siyasi rəhbərliyi müəyyənləşdirməlidir.

Mən ümid edirəm ki, Azərbaycan və Ermənistan arasında yeni açılım ola bilər. Amma bunun əhəmiyyətini çox da şişirtməyin yeri deyil. Çünki Overçukun iştirak etmədiyi iclası Rusiya qəbul etməyəcək ki, üçtərəfli müqavilənin müddəaları pozulub”.

Nərminə UMUDLU
Poliqon.info