Blinken Qəzza müharibəsi başlayandan ilk dəfə İsraili ən kəskin şəkildə tənqid edib

ABŞ dövlət katibi Entoni Blinken İsrailin Qəzza zolağındakı hərəkətlərinə dair Vaşinqtonun indiyədək ən kəskin tənqidini səsləndirib.

Poliqon xəbər verir ki, bu barədə Associated Press Agentliyinin məlumatında bildirilir. Agentlik qeyd edir ki, Bayden administrasiyasının rəsmisi İsrail qüvvələrinin müharibə taktikasının “günahsız mülki əhalinin dəhşətli ölümü ilə” nəticələndiyini bəyan edib.

Eyni zamanda, ABŞ dövlət katibi əlavə edib ki, israillilər HƏMAS-ın bütün liderlərini və yaraqlılarını zərərsizləşdirə bilməyiblər. Blinken qeyd edib ki, Ağ Ev müharibədən sonra Fələstin anklavının təhlükəsizliyini və idarəçiliyini təmin etmək üçün İsraildən etibarlı planlar gözləyir.

Blinken onu da vurğulayıb ki, HƏMAS yaraqlıları Qəzza zolağının İsrail əsgərlərinin artıq təmizlədiyi bəzi hissələrində yenidən peyda olublar. Dövlət katibi əlavə edib ki, Rəfah əməliyyatı Birləşmiş Ştatların Yaxın Şərqdəki ən yaxın müttəfiqini davamlı üsyanla üz-üzə qoya bilər.

Blinkenə görə Rafahdakı hərbi əməliyyat ilkin uğur qazana bilər. Lakin Ağ Evdə hesab edirlər ki,bu, əsas problemi həll etməyəcək və HƏMAS-ın Qəzza zolağı üzərində yenidən hakimiyyətə gəlməyəcəyinə zəmanət verə bilməyəcək.

Qeyd edək ki, mayın əvvəlində Amerika administrasiyası İsrailə müəyyən növ hücum silahlarının tədarükünü dayandırıb. İsrailin baş naziri cavabında bildirib ki, lazım gələrsə, İsrail dövləti təkbaşına döyüşəcək. İsrail ordusu da bildirib ki, Rəfahda əməliyyat keçirmək üçün kifayət qədər silahı var.

Poliqon.info