Haniyə: Atəşkəs danışıqlarında irəliləyiş var...

Fələstinin radikal HƏMAS hərəkatının Siyasi Bürosunun rəhbəri İsmayıl Haniyə atəşkəs razılaşması məsələsində irəliləyiş olduğunu bildirib.

Poliqon xəbər verir ki,Haniyənin sözlərinə görə hərəkat İsraillə danışıqlarda Qətərə və digər vasitəçilərə cavabını çatdırıb. Lakin Haniyə mümkün atəşkəs elanının dəqiq vaxtını açıqlamayıb.

“Hərəkat artıq Qətərdəki qardaşlarımıza və beynəlxalq vasitəçilərə cavab verib ki, biz artıq atəşkəs sazişinin bağlanmasına yaxınlaşırıq”, deyə HƏMAS hərəkatının rəsmi Telegram kanalında Haniyə deyib. Danışıqların digər təfərrüatları hələlik açıqlanmayıb.

Xatırladaq ki, noyabrın 18-də Amerikanın “The Washington Post” qəzeti mənbələrə istinadən yazıb ki, İsrail və HƏMAS ABŞ vasitəçiliyi ilə qadın və uşaqların azad edilməsi üçün münaqişənin beş gün müddətinə dayandırılması barədə ilkin razılığa gəliblər. Bununla belə, Ağ Evin sözçüsü bildirib ki, belə bir saziş hələ bağlanmayıb və onun imzalanma vaxtı barədə danışmaq hələ tezdir.

İsrailə görə, HƏMAS 240-250 nəfəri girov saxlayır. Onların əksəriyyəti İsrail vətəndaşları, 35-ə yaxını isə əcnəbidir.

Poliqon.info