SOCAR-ın sabiq prezidenti, İqtisadiyyat nazirinin müavini Rövnəq Abdullayev yaxın zamanda AFFA-nın prezidenti vəzifəsindən uzaqlaşdırılacaq...
Bununla bağlı redaksiyamıza daxil olan məlumatda bildirilir ki, sabiq SOCAR prezidentinin AFFA-dakı günləri də artıq sayılıdır. Böyük ehtimalla yaxın aylarda AFFA-nın növbədənkənar konfransı keçiriləcək və quruma yeni prezident seçiləcək.
Məlumata görə AFFA-da artıq post-Abdullayev dönəminə hazırlaşır və bəziləri prezidentlik kürsüsünə özünü layiq görməyə başlayıb. Lakin bütün hallarda AFFA prezidentliyi ilə bağlı qərar ən yüksək səviyyədə veriləcəyindən hələ kimsə bu kürsüdə kimin oturacağını bilmir.
Qeyd edək ki, Rövnəq Abdullayev 2005-2022-ci illərdə SOCAR-ın prezidenti vəzifəsini tutub. Bu illər ərzində dəfələlə milli neft şirkətindən külli miqdarda qazanc əldə edənlər arasında onun ən yaxın çevrəsinin adı hallanıb. Bu qazanc əsl sahiblərinin gizlədilməsi üçün hörümçək toruna bənzəyən sxemlə yaradılan onlarla şirkət vasitəsilə əldə edilib.
Rövnəq Abdullayev özünə yaxın adamlar vasitəsilə şirkətlər şəbəkəsi yaradaraq SOCAR-dan külli miqdarda qazanc götürüb. Məhz ona yaxın olduğu üçün bu şirkətlər SOCAR-la bağlanan müqavilələrdə üstün şərtlər əldə edib.
Rövnəq Abdullayev 2004-2008-ci illərdə "Neftçi" Peşəkar Futbol Klubunun prezidenti vəzifəsində çalışıb. 2008-ci il martın 14-də ilk, 2012-ci il martın 9-da ikinci, 2016-cı il martın 11-də üçüncü, 2020-ci il yanvarın 28-də isə dördüncü dəfə Azərbaycan Futbol Federasiyaları Assosiasiyasının prezidenti seçilib.
Son zamanlar Rövnəq Abdullayevin etimadı itirməsi ilə bağlı məlumatlar yayılır.
Polqon.info