HƏMAS hərəkatının hərəkətləri Səudiyyə Ərəbistanı ilə İsrail arasında münasibətlərin daha da normallaşmasının qeyri-mümkün olacağı vəziyyətə gətirib çıxara bilər...
Poliqon xəbər verir ki, bunu Çinin Global Times qəzeti çinli ekspertlərin rəyinə istinadən yazır.
“HƏMAS ehtiyat edir ki, Səudiyyə Ərəbistanı İsraillə münasibətləri normallaşdırarsa, digər ərəb ölkələri də bu addımı atacaq”, deyə ekspertlər bildirib.
Global Times-ın həmsöhbətləri bunun Fələstin üçün dağıdıcı nəticələrə səbəb ola biləcəyi qeyd edir. Müəlliflərin fikrincə, Fələstin ictimaiyyəti ərəb dövlətlərinin İsraillə yaxınlaşmasının qəti əleyhinədir.
Bəzi çinli ekspertlər hesab edir ki, HƏMAS-ın qəfil hücumu Səudiyyə Ərəbistanı ilə İsrail arasında münasibətlərin normallaşdırılması üzrə danışıqlara mane olmaqla yanaşı, həm də qarşılıqlı etimadı azaldacaq. Bu tərəflər arasında sülh və əlaqələrin inkişafına mane olacaq, regionda yeni reallıqlar yaradacaq. Həmçinin digər ərəb ölkələrinin də İsraillə normal münasibətlər qurmasının qarşısında ən azı bir neçə illik sədd çəkəcək
Amerikanın “National Interest” jurnalının köşə yazarı Karlos Roa da yazıb ki, HƏMAS-ın hücumu İsrail və Səudiyyə Ərəbistanı arasında yaranmaqda olan yaxınlaşmanı pozmaq məqsədi daşıyır.
Qeyd edək ki, oktyabrın 7-də HƏMAS İsrailə bir neçə min raket atıb və Əl-Əqsa əməliyyatının başladığını elan edib. Bunun fonunda İsrailin milli təhlükəsizlik naziri İtamar Ben-Qvir oktyabrın 7-də ölkədə fövqəladə vəziyyətə strat verib. İsrailin baş naziri Benyamin Netanyahu ölkənin müharibə vəziyyətində olduğunu bəyan edib. İsrail ordusunun HƏMAS-a qarşı əməliyyatı "Dəmir Qılınclar” adlanırıb. Ötən gün İsrail hökuməti rəsmən müharibə vəziyyəti elan edib. Endirilən zərbələr hər iki tərəfdən çox sayda insanın ölümünə və yaralanmasına səbəb olub, mülki infrastuktura ciddi ziyan dəyib.
Poliqon.info