Laçın və Ağdam-Xankəndi yolunda baş verənlər... - “Humanitar şou” ətrafında nə baş verir?..

Politoloq: “Regionun gələcəyində planları olan maraqlı tərəflərin “humanitar şou” tədbirləri davam edir”.

“Ermənilər görünür, “humanitar şou” oyununa çoxdan hazırlaşıb ki, neçə aylarıdır “ac qalmaq” görüntüsü yaratmağa çalışırlar. Amma bu da bir yerə qədərdir”.

Bu sözləri politoloq Azər Qasımov Qarabağ ətrafında baş verən son hadisələri Poliqon-a şərh edərkən qeyd edib.

Ötən həftənin sonlarından Laçın yolu və Ağdam-Xankəndi yolu ətrafında maraqlı hadisələr baş verir. İki gün əvvəl Rusiya Qırmızı Xaç Cəmiyyəti Ağdam-Xankəndi yolu ilə Qarabağın erməni əhalisinə yardım yollasa da, bu yardım hələ də ünvana çatmayıb. Azərbaycan tərəfi bunu Qərb və Rusiyanın ikibaşlı oyunları ilə əlaqələndirib. Erməni tərəfi isə bunu Azərbaycanın yeni tələblər irəli sürməsi ilə əlaqələndirib. Eyni zamanda Laçın yolundan da Rusiya Rusiya Qırmızı Xaç Cəmiyyətinə məxsus yardım maşını ermənilər tərəfindən Azərbaycana buraxılmır.

Bəs hazırda Laçın yolu və Ağdam-Xankəndi yolu və ümumilikdə “humanitar şou” ətrafında nə baş verir?

Mövzunu Poliqon-un əməkdaşı politoloq Azər Qasımov ilə müzakirə edib.

Azər Qasımov: “Rusiyanın Azərbaycanın tələblərinə uyğun yardım karvanının Ağdam istiqamətindən Xankəndiyə çatdırmaq istəyi sadəcə oyunun tərkib hissəsidir”.

Bütün maraqlı güclərin Azərbaycanın tələblərinə öz oyunlarını uyğunlaşdırmağa məcbur olduqlarını vurğulayan ekspert Poliqon-a bildirib ki, bütün bunlara baxmayaraq, şərtləri Azərbaycan qoyur:

“Regionun gələcəyində planları olan maraqlı tərəflərin “humanitar şou” tədbirləri davam edir. Azərbaycan ərazisində idarə olunmayan zona olduğunu qabartmaq üçün “humanitar şou” oyunu qurulub. Azərbaycan öz daxilində “boz ərazi” olduğunu qəbul etmir. Maraqlı qüvvələr isə zorla belə bir ərazinin olduğunu göstərmək istəyirlər. Məqsəd gərginliyi saxlamaqdır.

Rusiyanın Azərbaycanın tələblərinə uyğun yardım karvanının Ağdam istiqamətindən Xankəndiyə çatdırmaq istəyi isə sadəcə oyunun tərkib hissəsidir. Rusiya bunun olmayacağını əvvəlcədən bilirdi, çünki oyunu quran özüdür.

Azər Qasımov: “Sonunda Azərbaycanın hazqlı tələblərinin yerinəyetiriləcəyi şübhəsizdir”.

Azərbaycan belə oyunları poza-poza gəlir. Təbii ki, bu oyun da pozulacaq. Əsas odur ki, prosesdə söz sahibi Azərbaycandır. Bütün maraqlı güclər Azərbaycanın tələblərinə öz oyunlarını uyğunlaşdırmağa məcburdurlar. Şərtləri Azərbaycan qoyur. Heç bir oyunçunun da buna qarşı gəlmək gücü yoxdur.

Ermənilər görünür, “humanitar şou” oyununa çoxdan hazırlaşıb ki, neçə aylarıdır “ac qalmaq” görüntüsü yaratmağa çalışırlar. Amma bu da bir yerə qədərdir. Sonunda Azərbaycanın hazqlı tələblərinin yerinəyetiriləcəyi şübhəsizdir”.

Nərminə UMUDLU
Poliqon.info