İş adamı Roman Abramoviçə məxsus İngiltərənin “Çelsi” futbol klubunun satışından əldə olunan vəsaitin Böyük Britaniya tərəfindən Ukraynaya transferi Avropa İttifaqı səlahiyyətlilərinin mövqeyinə görə ləngiyir...
Poliqon xəbər verir ki, bu barədə mənbələrə istinadən The Daily Telegraph nəşri məlumat yayıb.
Nəşrin yazdığına görə, Böyük Britaniya hökuməti vəsaitlərin necə istifadə edilməsilə bağlı Aİ ilə məsləhətləşmələr aparır: ya onlar Londonun təkid etdiyi kimi, ukraynalı qaçqınların ehtiyaclarına yönəldilməlidir, ya da Brüsselin təklif etdiyi kimi, birbaşa Ukraynada istifadə olunmalıdır.
Abramoviç 2022-ci il martın 10-da Ukrayna hadisələri ilə əlaqədar Böyük Britaniyanın sanksiyalar siyahısında olub, bundan sonra onun krallıqdakı aktivləri dondurulub. Keçən il mayın 24-də Premyer Liqanın idarə heyəti "Çelsi"nin iş adamı Todd Boelinin konsorsiumuna satılmasını təsdiqləyib. Sahibkar qrupu klub üçün 4,25 milyard funt-sterlinq (5,36 milyard dollar) ödəyib. Bundan 2,5 milyard funt-sterlinq (3,15 milyard dollar) klubun özünə ödənilməli idi, daha 1,75 milyard funt-sterlinq (2,21 milyard dollar) onun inkişafına yatırılacaq.
25 may 2022-ci ildə Britaniya hökuməti Abramoviçə sahib olduğu komandanı satmağa icazə verən xüsusi lisenziya verib. Lisenziyanın verilməsinin şərti o idi ki, klubun qazandığı pulu sahibkar özü almasın. Krallığın səlahiyyətliləri, "Çelsi"nin satışından əldə edilən vəsaitin, xüsusən də ukraynalı qaçqınlara yardım göstərən xeyriyyə təşkilatlarına köçürülməsinə nəzarət etmək niyyətində olduqlarını bildirib.
Poliqon.info