Vaşinqtonun Ukraynaya dəstəyi əks-hücumun uğurundan asılı olacaq...

Poliqon xəbər verir ki, bu barədə Politico nəşri ABŞ administrasiyasının beş yüksək vəzifəli nümayəndəsinə istinadən yazır.

Politico qeyd edir ki, Ukrayna silahlı qüvvələri əks-hücum əməliyyatını uğurla başa vura bilsə, Kiyevin Qərb müttəfiqləri hərbi və maliyyə yardımını artıracaqlar. Lakin Ukrayna “ümidləri doğrultmasa”, Qərb ölkələrindən dəstək dayana bilər. Nəşr bunun ardınca tez bir zamanda diplomatik həll yolu tapmağa çağırışların olacağını proqnozlaşdırır.

Nəşr əlavə edir ki, Rusiya qoşunlarının Ukrayna ərazisinə daxil olmasından sonra Kiyev bir çox mühüm nəticələr əldə edib. Bununla belə, hərbi əməliyyatların hazırkı mərhələsi Vaşinqton üçün daha əhəmiyyətli status qazanıb. Nəşrin həmsöhbətləri bilmirlər ki, qanunvericilər cari tranş başa çatdıqdan sonra Ukraynaya daha çox vəsaitin ayrılmasına yaşıl işıq yandırıblarmı.

Ağ Ev hesab edir ki, Ukraynanın uğurlu əks-hücumunu Co Baydenin xarici siyasətdə növbəti qələbəsi kimi təqdim etmək olar. Onların fikrincə, prezidentlik yarışı ərəfəsində bu, ona özünü dünya səviyyəli dövlət xadimi kimi göstərməyə imkan verəcək.

ABŞ hakimiyyət orqanları istənilən halda Ukraynanı dəstəkləmək niyyətində olduqlarını dəfələrlə vurğulayıblar. Belə ki, iyunun 4-də ABŞ prezidentinin milli təhlükəsizlik məsələləri üzrə köməkçisi Ceyk Sallivan bildirib ki, Vaşinqton Ukraynanın əks-hücumunun nəticələri ilə bağlı heç bir qiymət vermək niyyətində deyil və nəticədən asılı olmayaraq Kiyevi dəstəkləməyə davam edəcək. Co Baydenin özü də iyunun 8-də Böyük Britaniyanın baş naziri Rişi Sunakla birgə mətbuat konfransında oxşar mövqeyi ifadə edib. Prezident deyib ki, ABŞ “lazım olduğu müddətcə” dəstəyi maliyyələşdirməyə davam edəcək.

Poliqon.info