Rusiya haqqında qanun Polşada “cini lampadan” çıxarıb...

Polşada “Rusiya təsiri” haqqında qanunun ölkə üçün vətəndaş müharibəsinə çevrilə biləcəyi barədə xəbərdarlıq edilib.

Poliqon xəbər verir ki, bu barədə Politico nəşrinin məlumatında bildirilir.

Qeyd edək ki, prezident Anjey Duda “Rusiyanın 2007-2022-ci illər arasında Polşa siyasətinə təsirini araşdırmaq üçün dövlət komissiyasının yaradılması haqqında” qanunu imzalayıb.

Anjey Duda və Hüquq və Ədalət (PiS) Partiyasının liderləri deyirlər ki, bu, Kreml agentlərinin Polşada kökünü kəsmək cəhdidir. Lakin müxalifət xəbərdarlıq edir ki, komissiya siyasi rəqibləri, xüsusən də Polşanın keçmiş Baş naziri və prezidenti Donald Tusku hədəfə almaq niyyətindədir.

Qeyd olunur ki, Polşa müxalifəti komissiyanın yaradılmasını seçkilər öncəsi PiS-in rəqiblərini qorxutmaq üçün nəzərdə tutulmuş siyasi silah adlandırıb.

“Prezident Anjey Duda bu gün ölkəmizi həm daxildə, həm də xaricdə ciddi şəkildə zəiflədib. O, Polşada vətəndaş müharibəsi törətmək qərarına gəlib”, deyə "Polşa 2050" müxalifət partiyasının rəhbəri Szimon Holovnia bildirib.

Polşa rəhbərinin imzaladığı qanundan danışan solçu lider Vlodzimek Çarzasti isə “Siz ölkəmizdə demokratiya üçün tamamilə biabırçı bir şey etdiniz”, deyib.

Solçular həmçinin Dudanı Dövlət Tribunalının qarşısına çıxmağa çağırıblar.

Nəşrin yazdığına görə, qanunun tənqidçiləri hesab edirlər ki, belə bir komissiyanın yaradılması Konstitusiyanı pozur, çünki onun funksiyaları dəqiq müəyyən edilməyib və komissiya üzvləri müəyyən edilmiş prosedur olmadığı halda hər hansı cinayət məsuliyyətindən qorunur.

Varşavadakı Sosial və Humanitar Elmlər Universitetinin dosenti Ben Stenli öz Twitter hesabında yazıb: “Duda məhkəmələrin, prokurorluğun və məxfi xidmətlərin funksiyalarını mənimsəyəcək komissiya yaratmağa icazə verən qanun imzalayıb” .

TASS-ın məlumatına görə, Avropa Komissiyası və ABŞ Dövlət Departamenti Polşa hakimiyyətinin yeni qanunu qəbul etməsindən narahatlığını bildirib və bu qanundan “Polşada azad və ədalətli seçkilərə müdaxilə etmək üçün qeyri-düzgün istifadə oluna biləcəyini” bildiriblər.

Poliqon.info