Misirin gizli şəkildə Rusiyaya sursat yollanmaq planları faş olub...

Poliqon xəbər verir ki, bu barədə ABŞ kəşfiyyatının sızdırılmış sənədlərinə istinadən The Washington Post yazıb. Məlumatda qeyd olunur ki, Sisi Qərblə problem yaşamamaq üçün Moskva ilə razılaşmanın gizli saxlanmasını istəyib.

17 fevral 2023-cü il tarixli çox məxfi sənəd Sisi ilə Misirin yüksək rütbəli hərbçilərinin danışıqlarından ibarətdir. Bu, söhbətlər Rusiyaya Misirdən mərmi və barıt tədarük etmək planları ilə bağlı olub.

Sızdırılan sənəddə Misir rəsmisi Salah əd-Dindən sitat gətirilir ki, Rusiya rəsmiləri ona “hər şeyi almağa” hazır olduqlarını deyiblər. Qeyd edilir ki, Salah əd-Din Misirin silah istehsalı naziridir.

Misir ABŞ-ın Yaxın Şərqdəki ən qədim müttəfiqlərindən biridir, 1987-ci ildən bu ölkə Vaşinqton üçün “NATO xaricində əsas müttəfiq” statusuna malikdir.

Misir Xarici İşlər Nazirliyi Moskva ilə belə danışıqların olmasını təkzib edir. ABŞ rəsmisi qəzetə deyib ki, Ağ Ev bu sursat transferindən xəbərsizdir.

Misir həm Rusiyanın taxıl tədarükündən, həm də ölkənin təhlükəsizliyini qorumaq üçün Qahirəyə hər il 1 milyard dollardan çox vəsait ayıran ABŞ-ın maliyyə yardımından asılıdır.

ABŞ mənbələri bundan əvvəl Şimali Koreyanın Rusiyaya gizli şəkildə artilleriya mərmiləri göndərdiyini, Çinin isə belə bir ehtimalı nəzərdən keçirdiyini bildirib.
Qeyd edək ki, ABŞ və NATO-nun məxfi sənədləri ilk dəfə martın 1-dən gec olmayaraq internetdə peyda olub. Məxfi məlumatlar olan fotolar Discord-da ortaya çıxıb.

Poliqon.info