Siyyarto: Macarıstan Orbanın Kiyevə səfərinə hazırlaşır və Ukrayna ilə dialoqa ümid edir…
“Macarıstanın baş naziri Viktor Orban lazımi şərait yaradılan kimi Kiyevə səfər etmək niyyətindədir. Macarıstan səfərə hazırlaşır və Ukrayna ilə dialoqa ümid edir”.
Poliqon.info xəbər verir ki, bu barədə bazar günü, martın 5-də Macarıstanın xarici işlər və xarici iqtisadi əlaqələr naziri Piter Siyyarto Index nəşrinə bildirib.
“Bütün ilkin şərtlər yaradılandan sonra səfər baş tutacaq. Hazırda Xarici İşlər Nazirliyi texniki hazırlıq mərhələsindədir”, deyə Siyyarto izah edib.
Nazir əlavə edib ki, Orban fevralın 9-da Brüsseldə Aİ sammitində Ukrayna prezidenti Vladimir Zelenski ilə danışıb. Bununla yanaşı, Siyyarto Macarıstanın Ukrayna ilə dialoqa hər zaman hazır olduğunu və bunun mənalı olacağına ümid etdiyini vurğulayıb.
Qeyd edək ki, Siyyarto dəfələrlə bildirib ki, Budapeşt Ukraynada dərhal atəşkəs əldə olunmasını və sülh danışıqlarının başlanmasını istəyir.
Poliqon.info