WSJ: İrandakı hərbi zavoda hücumun arxasında İsrail dayanır

PİA.az xəbər verir ki, bu barədə yanvarın 29-da “The Wall Street Journal” (WSJ) nəşri ABŞ rəsmilərinə və dron hücumundan xəbərdar olan mənbələrə istinadən məlumat yayıb.

WSJ-nin məlumatına görə, İsrail İranın müdafiə obyektlərinə dronlarla zərbə endirib. Nəşr qeyd edir ki, zərbə Vaşinqton və Qüdsün “Tehranın nüvə və hərbi ambisiyalarını cilovlamaq üçün yeni imkanlar axtarması”, o cümlədən “Rusiya ilə hərbi əməkdaşlığın artırılması” fonunda baş verib.

The Wall Street Journal yazır ki, bu, baş nazir Benyamin Netanyahu vəzifəyə gəldikdən sonra İrana qarşı məlum olan ilk İsrail zərbəsidir. Qeyd edilir ki, İsrail hakimiyyəti onların İsfahan hücumunda iştirakı ilə bağlı xəbərləri rəsmi şəkildə şərh etməyib.

WSJ qeyd edir ki, hadisədən bir gün sonra yayımlanan peyk görüntülərində vurulan binaya cüzi ziyan dəyib. İran rəsmiləri daha əvvəl damın zədələnməsi barədə məlumat vermişdilər.

Qeyd edək ki, yanvarın 29-na keçən gecə İranın mərkəzi hissəsində yerləşən İsfahan şəhərində güclü partlayışın baş verməsi barədə İran mətbuatı məlumat yayıb. İslam Respublikasının Müdafiə Nazirliyi pilotsuz təyyarələrin hərbi obyektə uğursuz hücumu barədə məlumat verib. Nazirlik iddia edir ki, bir pilotsuz təyyarə hava hücumundan müdafiə sistemi tərəfindən vurulub, daha ikisi müdafiə tələlərinə düşüb və partlayıb. Müdafiə Nazirliyindən əlavə ediblər ki, hücum nəticəsində ölən və yaralanan olmayıb. İran Xarici İşlər Nazirliyi hadisəni islam respublikasının təhlükəsizliyini zəiflətməyə yönəlmiş “qorxaq addımlar” adlandırıb.

Əl-Ərəbiyyə telekanalı mənbələrə istinadən bildirib ki, İsfahandakı hücumda ABŞ Hərbi Hava Qüvvələri və “başqa bir ölkə” iştirak edib. Eyni zamanda, Al Hadath telekanalının amerikalı mənbələri iddia edir ki, zərbənin əsas hədəfi balistik silahların istehsalı və ixracı üçün” zavodların tikintisinı qarşısını alamq və ABŞ-ın hər şeyə hazır olduğunu İran və Rusiyaya nümayiş etdirməkdir.

pia.az