Ermənistanın hakim “Vətəndaş müqaviləsi” partiyasında Baş nazir Nikol Paşinyanın son kadr dəyişiklikləri ilə bağlı narazılıqlar ortaya çıxıb...
PİA.az xəbər verir ki, bu barədə Ermənistanın “Hraparak” qəzeti yazıb.
Qəzetin yazdığına görə, Paşinyanın son kadr dəyişiklikləri ilə bağlı hakim “Vətəndaş müqaviləsi” partiyasında dözümsüzlük müşahidə olunur. Xüsusən partiyanın veteranları Paşinyanın son qəararlarından narazılıq ifadə edirlər.
“Əvvəlcə baş nazirin müavini Hambartsum Matevosyan tutduğu vəzifədən azad edildi, onun yerinə isə “keçmiş” kadrlardan partiyasız Tiqran Xaçatryan təyin olundu. Halbuki partiyanın veteranlarından olan Araik Arutyunyan və Romanos Petrosyan bu vəzifəyə göz dikmişdilər”, deyə “Hraparak” qəzeti yazır.
Maliyyə naziri postuna partiyasız Vahe Hovhannisyanın təyin edilməsi və parlamentlə heç bir əlaqəsi olmayan Janna Andreasyanın Təhsil, Elm, Mədəniyyət və İdman Nazirliyinə rəhbər gətirilməsi “Vətəndaş müqaviləsi” partiyasında səbrləri daşırıb.
Qəzet yazır ki, Paşinyanın “Vətəndaş müqaviləsi” partiyasından kənar adamların vəzifələrə təyin edilməsi hakim partiya üzvləri tərəfindən birmənalı qarşılanmır.
pia.az