Tehran öz “politoloqlarının” Azərbaycanı şərləyən əməllərini görmür...
“Sionist Bakı rejimi”nə qarşı “mübarizəsi” ilə tanınan iranlı politoloq Ehsan Movakhediyan Azərbaycanı İranın cənub-qərbindəki Xuzistan əyaləti İza şəhərində baş verən terror aktında ittiham edib.
PİA.az xəbər verir ki, iranlı “politoloq” özünün Twitter səhifəsində hücumu İsrail və Türkiyədən gələn təlimatlarla “Əliyev terrorçuların” həyata keçirdiyini yazıb.
Movakhediyan terror aktını törədən 3 nəfərin Bakıya qaçmağa cəhd edərkən tutulduğunu iddia edib və bu zaman İranın vitse-prezidenti Mohsen Rezaiyə istinad edib.
Rezainin söylədikləri isə İran mətbuatında bilərəkdən, ya da bilməyərəkdən texniki səhvə məruz qalıb. Çünki Rezai ümumiyyətlə Bakıdan deyil, Qərbi Azərbaycan əyalətinin Türkiyə ilə sərhəddə yerləşən Maku şəhərindən bəhs edib və tutulanların məhz Makuya qaçmağa çalışdıqlarını bildirib.
Sonradan İran mətbuatı bu səhvini düzəltsə də, “politoloq” Ehsan Movakhediyan İran mətbuatında vitse-prezidentin yanlış ifadə olunmasından Azərbaycana qarşı istifadə etməyə çalışıb və öz “səhvini” düzəltməyib.
Xatırladaq ki, bu günlərdə İranın Xarici İşlər Nazirliyi Azərbaycanın bu ölkədəki səfirini dəvət edərək Azərbaycan mətbuatının İrana qarşı sərgilədiyi mövqeyə görə səfirə nota təqdim etmişdi. İran isə öz “politoloqlarının” Azərbaycanı şərləyən bu tipli əməllərini görmür.
pia.az
Digərxəbərlər
Populyar xəbərlər
