Bu gün Azərbaycan Respublikasının Əməkdar Jurnalisti, Azərbaycanın Milli Qəhrəmanı, Qarabağ müharibəsi şəhidi Alı Mustafa oğlu Mustafayevin doğum günüdür.
A.Mustafayev 1952-ci il 14 aprel tarixində Qazax rayonunun Qazaxbəyli kəndində fəhlə ailəsində anadan olub. 1969-cu ildə kənd məktəbini bitirib, ordu sıralarında hərbi xidmətdə olub. 1971–1976-ci illərdə Bakı Elektrik Maşınqayırma Zavodunda tokar çalışıb. 1981-ci ildə Azərbaycan Dövlət Universitetinin Jurnalistika fakültəsini bitirib.
O, Azərbaycan Dövlət Televiziya və Radio Verilişləri Komitəsində ədəbi-bədii yaradıcılığa tələbəlik illərindən başlayıb. Onun lirik şeirləri və publisist yazıları dövri mətbuatda müntəzəm çap edilirdi. Dolğun məzmunlu reportaj, oçerk və müsahibələrinə, ekrana çıxardığı təsirli verilişlərinə görə bacarıqlı, operativ telejurnalist kimi tanınıb. Alı Mustafayev “Günün ekranı” proqramının aparıcı əməkdaşlarından biri olub.
A.Mustafayev 1990-cı il yanvarın 20-də Bakının dar küçələrində insanların Sovet ordusu tərəfindən hədəfə alınmasını lentə köçürürdü. O, Ermənistan hərbi birləşmələrinin Azərbaycana hücumu dövründə Dağlıq Qarabağdan - qaynar nöqtələrdən, eləcə də yüksək dövlət səviyyəli rəsmi görüşlərdən hazırladığı müsahibə və reportajlarla rəğbət qazanıb.
O, həm də 1989–1990-cı illərdə Moskva şəhərində Azərbaycan Respublikası Ali Məclisi tərəfindən parlament müxbiri olub.
1991-ci ilin 18-19 noyabrında erməni quldurların Xocavəndin Qaradağlı kəndində kütləvi qırğın törətməsi xəbərini eşidən Alı Mustafayev bütün gecəni yata bilməyib. Səhər iş yerinə, yəni Azərbaycan Televiziyasına gəlib, təcili Ağdama yola düşən qrupa rəhbərliyi öz üzərinə götürüb.
Yoldaşlarının səhhətindəki problemləri təkidlə xatırlatması onu bu ağır səfərdən çəkindirə bilməyib. Noyabrın 20-də Ağdamdan Azərbaycanın dövlət və hökumət rəsmilərini, yüksək rütbəli hərbçiləri Qaradağlıya aparan hərbi vertolyota Alı Mustafayevin reportyor qrupu son anda özünü yetirdi.
O, 1991-ci il 20 noyabrda Xocavənd rayonunun Qarakənd kəndinin yaxınlığında, Ağdam rayonunun Mərzili kəndi ərazisində erməni hərbiləşdirilmiş dəstələri tərəfindən vurulan Azərbaycana məxsus hərbi helikopter hadisəsində həlak olub.
Hesablamalara görə, Qarakənd üzərində 300 metr yüksəklikdə uçan Mİ-8 N72 helikopteri 1991-ci il noyabrın 20-də saat 14:42 dəqiqədə vurulub.
A.Mustafayev Bakıda Şəhidlər xiyabanında dəfn edilib. Onun üç övladı var.
O, 1991-ci ildə fəaliyyətinə görə “İlin ən yaxşı jurnalisti” mükafatına layiq görülüb. Ölümündən sonra Alı Mustafayevə Azərbaycan Respublikasının Prezidentinin 6 noyabr 1992-ci il tarixli 294 saylı fərmanı ilə Azərbaycanın Milli Qəhrəmanı fəxri adı verilib.
Bakı şəhər Nərimanov rayonundakı 202 saylı orta məktəb və küçə Alı Mustafayevin adını daşıyır. 1992-ci ildən onun adını daşıyan gəmi də var.
pia.az
Digərxəbərlər
Populyar xəbərlər
