İranın BMT-dəki Daimi Nümayəndəliyi bildirib ki, Tehranın Donald Trampa sui-qəsd cəhdində iştirakı ilə bağlı ittihamlar qərəzlidir...
Poliqon IRNA Agentliyinə istinadən xəbər verir ki, Daimi Nümayəndəlik CNN telekanalının İranın ABŞ-ın keçmiş prezidentinə sui-qəsd təşkil etməsi ilə bağlı iddilarına belə cavab verib.
“Bu ittihamlar əsassız və qərəzlidir. İran İslam Respublikası nöqteyi-nəzərindən Tramp Süleymaninin öldürülməsinə göstəriş verdiyinə görə məhkəmədə mühakimə edilməli və cəzalandırılmalı olan cinayətkardır”, deyə nümayəndəlikdən IRNA Agentliyinə bildirilib.
CNN-in iddilarında qeyd olunub ki, İran rəsmiləri İslam İnqilabı Keşikçiləri Korpusunun Qüds Qüvvələrinin rəhbəri Qasım Süleymaninin qətlinə görə ABŞ hərbçilərindən qisas almağa hazır olduqlarını dəfələrlə bəyan ediblər. Xatırladılır ki, General-leytenant 2020-ci ildə ABŞ-ın Bağdad hava limanına raket hücumu nəticəsində həlak olub. Donald Tramp həmin vaxt ABŞ-ın prezidenti idi.
Trampa sui-qəsd iyulun 13-də Pensilvaniyada seçki kampaniyası zamanı baş verib. Güllə ABŞ-ın keçmiş prezidentinin sağ qulağına dəyib. Mitinq iştirakçılarından biri ölüb, ikisi yaralanıb. Atıcının 20 yaşlı Tomas Metyu Kruks olduğu üzə çıxıb və o, ABŞ Məxfi Xidmətinin əməkdaşları tərəfindən yerindəcə güllələnib.
Poliqon.info