“Həyatımda yalnız Eynulla Fətullayevə  sillə vurmuşam...” – Həbsdəki MTN generalı

R.Səfərov yazır ki, ləğv edilmiş MTN-nin Antiterror İdarəsinin keçmiş rəisi, general Elçin Quliyevdən jurnalist Pərviz Həşimlinin həbsi, ona işgəncələr verilməsi ilə bağlı dedikləri barədə soruşub. Keçmiş idarə rəisi jurnalisti təkzib edərək deyib: “Yalan deyir. Mən həyatımda bir nəfərə sillə vurmuşam - Eynulla Fətullayevə... Ondan başqa xidmət etdiyim dövrdə heç kimlə sərt davranmamışam...”

Pərviz Həşimli isə MTN-də gördüyü işgəncələri belə təsvir edib: “Məni həbs edən günü bir neçə saat psixoloji təzyiq üçün xüsusi işgəncə otağına apardılar. Orada qəssab dükanlarında olan çarmığa bənzər xüsusi qurğu vardı. Əlləri sıxmaq üçün məngənəyə qədər qoyulmuşdu. Bu cür işgəncə otağını ancaq filmlərdə görmək olar. 3 saat bu otaqda qaldım. Alçaldıcı ifadələr, hədələr o qədər çox olurdu ki, bir dəfə İlqar Əliyevin (Elçin Quliyevin müavini, təcridxanada özünə qəsd edərək ölüb – red) masasının üzərindəki qayçını götürüb, özümə xəsarət yetirmək istədim. Sonrakı günlər karserə salınırdım. Bir dəfə isə məni paltarsız vəziyyətdə MTN-nin sonuncu mərtəbəsindəki gəzinti meydançasına saldılar. Qarlı bir gün idi. Möhkəm soyuqladım. “Amnesty İnternational” ayrıca bəyanatla çıxış edərək, MTN rəhbərindən mənə qarşı işgəncənin dayandırılmasını tələb etdi. Bundan sonra işgəncələr dayandı”.

Elçin Quliyevin dediklərinə Eynulla Fətullayevdən şərh almaq mümkün olmayıb.(azpolitika.info)

pia.az