Sabiq nazirin qardaşı özünü təqsirli bilmir - Hökm təxirə düşdü

Bakı Ağır Cinayətlər Məhkəminin hakimi Samir Əliyevin icraatında olan prosesdə Ə.Əhmədov son söz deyib: "Günahsız olduğum məhkəmə istintaqında da sübuta yetirilib, siz olanları gördünüz. İnanıram ki, ədalətli qərar verəcəksiniz".

Məhkəmə hökmü elan etmək üçün müşavirəyə çıxsa da, bir qədər sonar zala qayıdaraq məhkəmə istintaqını qismən yenilədiklərini bildiriblər. İşi aparan müstəntiqin məhkəmədə dindirilməsinə zərurət yaranıb. Bu səbəbdən məhkəmə bu gün saat 17:00-dək təxirə salınıb.

İttihama görə, Əvəz Əhmədov Hörmət Əsgərov adlı şəxsi özünə məxsus Sabunçu rayonu ərazisində yerləşən “Park Plyus” əyləncə mərkəzində girov götürüb. H.Əsgərovdan ona borclu olduğu pulu tələb edib. Daha sonra isə H.Əsgərovun qohumu Rəşad Tahirov həmin borcu qaytaracaqlarını söz verib və buna görə də Hörmət Əsgərovu sərbəst buraxıb.

Daha sonra Ə.Əhmədov hədə-qorxu ilə Rəşad Tahirovdan 140 min dollar alıb. Lakin Əvəz Əhmədov özünü təqsirli bilməyib.

Zərərçəkmiş Hörmət Əsgərov Müdafiə Nazirliyi Hərbi Hava Qüvvələrinin Tibb Xidməti rəisi, tibb xidməti polkovniki olub. 2015-ci il dekabr ayında nazir Zakir Həsənov onu vəzifəsindən azad edib.

Ə.Əhmədov məhkəmə zamanı dəyən ziyanı ödəyib, zərərçəkənlərin hər ikisi ilə barışıq əldə edib.(Qafqazinfo)

pia.az