NATO üzvləri Münhen Təhlükəsizlik Konfransında Rusiyanın Şimali Atlantika Alyansı ölkələrindən birinə hücum ehtimalını müzakirə ediblər...
Poliqon xəbər veror ki, bu barədə Bloommberg Agentliyi mənbələrə istinadən məlumat yayıb. Agentliyin məlumatına görə, müzakirə iştirakçıları hesab edirlər ki, bu təhlükə “təcili reaksiya” tələb edir. Digər tərəfdən isə NATO ölkələri ABŞ-ın Avropanın müdafiəsində ənənəvi rolunu davam etdirəcəyinə getdikcə şübhə edir.
Bloomberg yazır ki, Münhen konfransında ABŞ-la bağlı bədbin proqnozlar üstünlük təşkil edib. Müzakirələrdə ştirak edən NATO müdafiə nazirləri Vaşinqtonun hələ də Ukraynaya maliyyə ayırmamasından narahat olduqlarını bildiriblər.
Nazirlər ABŞ dəstəyinin zəifləməsi fonunda Rusiyanın NATO müttəfiqinə birbaşa hücuma keçməyə sövq edə biləcəyi ssenariləri müzakirə ediblər. Bloomberg-in həmsöhbətlərindən biri qeyd edib ki, keçmiş görüşlərdəki qətiyyətdən fərqli olaraq, bu il Münhendə qeyri-müəyyənlik əhval-ruhiyyəsi hökm sürüb.
Almaniyanın müdafiə naziri Boris Pistorius Bloomberg-ə müsahibəsində Rusiyanın hücumunun olub-olmayacağını və ya nə vaxt olacağını bilmədiyini bildirib. Lakin Bundesver rəhbəri bunun beş-səkkiz ildən sonra baş verə biləcəyini istisna etməyib.
NATO-nun hərbi komitəsinin rəhbəri Rob Bauer daha əvvəl bəyan etmişdi ki, alyansın qüvvələri yaxın iyirmi ildə Rusiya ilə genişmiqyaslı müharibəyə hazırlaşır. O, NATO-ya üzv ölkələrin hakimiyyət orqanlarını və onların mülki əhalisini münaqişəyə və mümkün hərbi çağırışa hazırlaşmağa çağırıb.
İsveç, Norveç, Almaniya, Böyük Britaniya və bir sıra digər Avropa ölkələrinin rəsmiləri bu yaxınlarda Rusiya ilə mümkün müharibə hazlrlaşdıqlarını elan ediblər. Rusiya hakimiyyəti bu bəyanatları informasiya müharibəsinin bir hissəsi və avropalı siyasətçilərin öz vətəndaşlarının diqqətini iqtisadiyyatdakı problemlərdən yayındırmaq cəhdi adlandırır. Rusiya prezidenti Vladimir Putin bildirib ki, Moskva Polşa və ya Latviyaya qoşun yeritmək niyyətində deyil. Onun sözlərinə görə, Rusiyanın Avropada heç bir ərazi iddiası yoxdur və Avropa hakimiyyəti Rusiya təhlükəsini şişirdir.
Poliqon.info