Viktor Orban bildirib ki, Macarıstan Qətərlə qaz alqı-satqısı müqaviləsi imzalayıb...
Poliqon xəbər verir ki, Macarıstanın Baş naziri Viktor Orban Qətər əmiri Təmim bin Həməd Əl Tani ilə danışıqlardan sonra bildirib ki, Macarıstan Qətərlə qaz alqı-satqısına dair müqavilə bağlayıb, ölkələr iqtisadi əməkdaşlığı inkişaf etdirmək niyyətindədirlər.
"Son bir il ərzində Qətərin Avropa üçün mühüm əhəmiyyət kəsb edən ölkə olduğunu öyrəndik. Avropa iqtisadiyyatı çatışmayan rus qazının əhəmiyyətli bir hissəsini buradan gələn LNG ilə doldurdu... Biz enerji sahəsində əməkdaşlıq haqqında razılığa gəldik və əməkdalıq edəcəyik. Bir neçə ayaq üstündə durmaq həmişə bir ayaq üstündə durmaqdan yaxşıdır”, deyə Orban Dohadan Facebook-da paylaşdığı videomüraciətdə deyib.
Orban, həmçinin qeyd edib ki, “hərtərəfli və səmərəli danışıqlardan” sonra Macarıstan və Qətər liderləri infrastruktur və hava nəqliyyatını inkişaf etdirmək, rabitə və kənd təsərrüfatı sahəsində əməkdaşlıq etmək barədə razılığa gəliblər.
“Bununla da biz Qətər-Macarıstan iqtisadi əməkdaşlığı üçün yaxşı perspektiv açmışıq”, deyə Macarıstanın Baş naziri bildirib.
Poliqon.info