“Laçın” postu işə yaramır?

Politoloq: “Erməni separatçı-terrorçularının növbəti dəfə qanunsuz silah-sursat daşımasının üzə çıxması ciddi faktdır”.

“Burada əsas narahatlıq yaradan məqam separatçıların silah-sursatı necə və hansı yolla əldə etməsidir”.

Bu sözləri politoloq Turan Rzayev Qarabağda erməni separatçılarının qanunsuz silah-sursat daşımasını Poliqon-a şərh edərkən qeyd edib.

Xəbər verdiyimiz kimi erməni separatçı-terrorçularının növbəti dəfə qanunsuz silah-sursat daşıdığı üzə çıxıb.Hadisə Xankəndi-Qeybalı-Xəlfəli yolunda qeydə alınıb. Silah daşındığını təsdiqləyən görüntülərdən də bu aydın şəkildə görünür ki, qanunsuz erməni birləşmələri həmin mövqedə postlar qurub və aktiv şəkildə ora silah daşıyır.

Qarabağda rus sülhməramlılarının özbaşınalığı nə vaxta qədər davam edəcək və “Laçın” postu işə yaramır?

Mövzunu Poliqon-un əməkdaşı politoloq Turan Rzayev ilə müzakirə edib.

Turan Rzayev: “Prinsip etibarilə bu ilk belə hadisə olmasa da, sülhməramlıların mandatına uyğun olmayan işlər ilə məşğul olduğunu bir daha sübut edir”.

Sülhməramlıların separatçıları silahlandırmasının qəbuledilməz olduğunu vurğulayan politoloq əlavə edib ki, rəsmi Bakı bu prosesin qarşısını ən qısa zamanda almalıdır:

“Erməni separatçı-terrorçularının növbəti dəfə qanunsuz silah-sursat daşımasının üzə çıxması ciddi faktdır. Xankəndi-Qeybalı-Xəlfəli istiqamətində separatçıların postlarının olması indiki məqamda narahatlıq yaradan məqam deyil. Mümkündür ki, rəsmi Bakı separatçıların postlarının harda olduğunu yaxşı bilir. Yəni istənilən halda bu postlar rahatlıqla məhv edilə bilər.

Burada əsas narahatlıq yaradan məqam separatçıların silah-sursatı necə və hansı yolla əldə etməsidir. Məsələ ondadır ki, erməni separatçı-terrorçuların daşıdığı qanunsuz silah-sursat Ermənistandan gətirilməyib. Ən azından bu quru yolu ilə baş tutmayıb.

Ümumiyyətlə, “Laçın” postu qurulduqdan sonra dövlət sərhədimizdən silah keçirilməsi mümkün deyil. Ordan keçən bütün mülki və digər təyinatlı nəqliyyat vasitələri və şəxslər yoxlanılır. Yalnız müvafiq yoxlanış sonrası Azərbaycan ərazisinə girişinə icazə verilir.

Qeydə alınan videogörüntülərdən də aydın şəkildə görünür ki, rus sülhməramlıları qanunsuz erməni birləşmələrini müşayiət etməklə, onların "postları" arasında silah daşımasına yardım edirlər.

Prinsip etibarilə bu ilk belə hadisə olmasa da, sülhməramlıların mandatına uyğun olmayan işlər ilə məşğul olduğunu bir daha sübut edir. Digər bir məsələ ilə həmin silah-sursatın separatçılara sülhməramlılar tərəfindən verildiyini göstərir.

Turan Rzayev: “Rusiya sülhməramlıları bütün bunlara baxmayaraq separatçıları silahlandırmağa davam edəcəyi təqdirdə rəsmi Bakı separatçıların təyin edilən postlarını zərbələr endirməlidir”.

Sülhməramlılara davamlı şəkildə silah-sursat ya birbaşa Rusiya ərazisindən ya da Ermənistandakı hərbi bazalarından quru və hava yolu ilə gəlir. “Laçın” postumuzn qurulması sonrasında bu proses dayanıb.

Belə davam edirsə, ən azından proses Bakının nəzarətindədir. Lakin indiki məqamda separatçılara verilən silahları Rusiya sülhməramlıları hava yolu ilə həyata keçirir.

Sülhməramlıların separatçıları silahlandırması qəbuledilməzdir. Rəsmi Bakı bu prosesin qarşısını ən qısa zamanda almalıdır. İlk növbədə bu barədə Azərbaycan tərəfi həm, Rusiyaya, həm də sülhmərmalıların komandanlığına xəbərdarlıq etməlidir. Bundan başqa Rusiya sülhməramlılarına gətirilən silah-sursat və texnika yalnız quru yolu ilə olmalıdır. Yəni müvafiq qaydada və rotasiya qaydalarına uyğun olaraq Laçın postundan keçməklə həyata keçirilməlidir.

Rusiya sülhməramlıları bütün bunlara baxmayaraq separatçıları silahlandırmağa davam edəcəyi təqdirdə rəsmi Bakı separatçıların təyin edilən postlarını zərbələr endirməli və bununla bir daha ciddiyyətini göstərməlidir.

Ümumiyyətlə erməni separatçılarının tərkisilah edilməsi prosesi mütləq şəkildə başlamalıdır. Rusiya sülhməramlıları bunu etmək iqtidarında yada istəyində deyilsə Azərbaycan özü prosesi reallaşdırmalıdır”.

Nərminə UMUDLU
Poliqon.info