“Kişinyovda sülh müqaviləsi imzalana bilər” - Qabil Hüseynlidən sensasion açıqlama

Politoloq: “Vaşinqtonda xarici işlər nazirlərinin sülh danışıqlarında irəliləyişlər var”.

“Əgər Rusiya Brüssel görüşünə mane olmazsa və Brüssel görüşü baş tutarsa, Ermənistan da sülhyaratma yolunda güzəştlərə razı olarsa, sülh prosesində çox böyük addımlar atıla bilər”.

Bu sözləri politoloq Qabil Hüseynli Azərbaycan və Ermənistan liderlərinin Brüsseldə görüşəcəyi xəbərlərinin yayılmasını Poliqon-a şərh edərkən qeyd edib.

Finansial Times nəşri bu gün mayın 14-də İlham Əliyevlə Nikol Paşinyanın Brüsseldə görüşəcəyini yazıb. Vaşinqtonda xarici işlər nazirlərinin görüşündən həmən sonra Brüsseldə liderlərin görüşməsi nədən xəbər verir? Sülh yolunda hansısa ümidlərdən danışmaq olar? Ümumiyyətlə, Qərbin hazırkı vasitəçiliyini necə dəyərləndirmək olar?

Sülh yolunda Azərbaycan və Ermənistanın atdığı addımları Poliqon-un əməkdaşı politoloq Qabil Hüseynli ilə müzakirə edib.

Qabil Hüseynli: “Moldovanın paytaxtı Kişinyovda Avropa Siyasi Cəmiyyətinin sammiti olacaq. Belə fikirlər var ki, həmin sammitdə təntənəli surətdə sülh müqaviləsi imzalana bilər”.

İndiyə qədər qət edilmiş yolla, bundan sonra qət edilməsi nəzərdə tutulan yolları müqayisə edən politoloq Poliqon-a açıqlamasında vurğulayıb ki, Kişinyovda sülh müqaviləsi imzalana bilər:

“Bəzən baxırsan ki, bizim mətbuatda Vaşinqton görüşlərinin əhəmiyyətini azaldan yazılar olur. Ancaq mənim fikrimcə, Vaşinqtonda xarici işlər nazirlərinin sülh danışıqlarında irəliləyişlər var. Hətta, deyərdim ki, bəzi məsələlərdə kordinal irəliləyişlər var.

Demək olar ki, sülh danışıqlarının konseptual əsasları formalaşıb və yaxud da formalaşmaq üzrədir. Əgər Rusiya Brüssel görüşünə mane olmazsa və Brüssel görüşü baş tutarsa, Ermənistan da sülhyaratma yolunda güzəştlərə razı olarsa, sülh prosesində çox böyük addımlar atıla bilər. Hətta, Brüsseldə sülhyaratma prosesinin mətninin əsas müddəaları razılaşdırıla bilər.

Qeyd edim ki, Moldovanın paytaxtı Kişinyovda Avropa Siyasi Cəmiyyətinin sammiti olacaq. Belə fikirlər var ki, həmin sammitdə təntənəli surətdə sülh müqaviləsi imzalana bilər. Mən bunu birmənalı formada söyləmirəm. Amma indiyə qədər qət edilmiş yolla, bundan sonra qət edilməsi nəzərdə tutulan yolları müqayisə etsək, demək olar ki, Kişinyovda sülh müqaviləsi imzalana bilər. Bu mənim şəxsi qənaətimdir”.

Nərminə UMUDLU
Poliqon.info