İsrail Ordusu (İDF) Fələstinin HƏMAS hərəkatının təxribatlarından sonra Qəzza zolağında əməliyyatları bərpa etdiyini bildirib...
Poliqon xəbər verir ki, bu barədə İsrail ordusunun Telegram kanalındadakı bildirilir. Məlumatda Bakı vaxtı ilə saat 7:54-də İDF hava hücumundan müdafiə qüvvələrinin Qəzza zolağından atılan raketin qarşısını aldığını qeyd edilir.
“Həmas əməliyyat fasiləsini pozaraq İsrail ərazisinə atəş açıb. İsrail Müdafiə Qüvvələri Qəzza zolağında terror təşkilatı HƏMAS-a qarşı döyüş əməliyyatlarını bərpa edib”, deyə İsrail ordusunun Telegram kanalındakı mesajında bildirilir.
Yerli vaxtla səhər altı və yeddi radələrində Qəzza zolağından raket buraxılışı xəbərdarlığı sirenləri səslənib.
Qeyd edək ki, ötən gecə The Wall Street Journal qəzeti Misir rəsmilərinə istinadən iddia edib ki, İsrail və Həmas atəşkəsi daha bir gün uzatmağa razılaşıblar. Qəzetin mənbələrinin məlumatına görə, razılaşma çərçivəsində əksəriyyəti qadın və uşaqlardan ibarət daha 10 girov azad ediləcək.
Xatırladaq ki, atəşkəs razılaşması ötən cümə günü qüvvəyə minib. Qətər, Misir və ABŞ-ın vasitəçiliyi ilə buna nail olunub. Razılaşma Qəzza zolağına humanitar yardımın çatdırılmasını və “bir girov üçün üç məhbus” formuluna əsasən israilli girovların fələstinli məhbuslarla dəyişdirilməsini əhatə edirdi. İlkin razılaşmada dörd günlük atəşkəs nəzərdə tutulurdu, sonra razılaşma daha iki gün, daha sonra isə bir gün uzadıldı.
Poliqon.info