İslandiyada vulkan püskürməsi nəticəsində yaranan təhlükəli emissiyalar Avropaya çatıb...
Poliqon xəbər verir ki, bu barədə The Watchers nəşri məlumat yayıb.
İlkin proqnozlara görə, bu çirklənmə insanlar üçün təhlükəli deyil.
Reykjanes yarımadasında bu il altıncı püskürmə avqustun 22-də başlayıb və əhəmiyyətli dərəcədə kükürd dioksid emissiyasına səbəb olub. Onlar Şimali Atlantikadan keçərək, avqustun 24-də Avropanın şimal-qərbinə çatıb və daha da şərqə doğru gedib.
Kopernik Atmosfer Monitorinq Xidmətinin məlumatına görə, peyk müşahidələri atmosferdə ən yüksək konsentrasiyanın 5-8 km hündürlükdə olduğunu, lakin bəzi yerlərdə yer səviyyəsində də SO2 konsentrasiyasında müəyyən qədər artım olduğunu göstərir.
"Reykjanes yarımadasında vulkanik aktivliyin və püskürmələrin artması müşahidə olunur. Bu, atmosferdə böyük kükürd dioksid buludları ilə nəticələnir", deyə Kopernik üzrə baş alim Mark Parrinqton bildirib.
İslandiya Meteorologiya İdarəsinin hesabatına görə, bütün dəlillər bu püskürmənin 2023-cü ilin əvvəlindən bu ərazidəki ən böyük püskürmə olduğunu göstərir. Lava iki əsas axınla əsasən şimal-qərbə axır və onun irəliləməsi xeyli yavaşlayıb.
Qeyd edək ki, avqustun 22-də Reykjanes yarımadasında İslandiyada yeni vulkan püskürməsi başlayıb. Püskürmə başlayandan sonra bir neçə yüz metr hündürlükdə qaz şleyfinin qalxması müşahidə edilib.
Faqradalsfjadl vulkanı 800 ildən sonra ilk dəfə 2021-ci ilin yanvarında püskürməyə başlayıb. O vaxtdan bəri vulkan vaxtaşırı aktivləşərək yerdəki çatlardan lava buraxır.
2023-cü ildə vulkanın fəaliyyəti o qədər artıb ki, Qrindavik şəhərinin sakinləri təxliyə edilməli olub.
Poliqon.info