İran Xarici İşlər Nazirliyi: ABŞ tərəfindən dondurulmamış aktivlər Tehranın mülahizəsinə əsasən istifadə olunacaq...
“İranın ABŞ tərəfindən məhbus mübadiləsi sazişinin bir hissəsi kimi azad etdiyi təxminən 6 milyard dollarlıq maliyyə aktivləri İran hakimiyyəti tərəfindən ölkənin ehtiyacları və prioritetləri əsasında istifadə ediləcək”.
Poliqon xəbər verir ki, bu barədə İran Xarici İşlər Nazirliyinin bəyanatında deyilir.
Bundan əvvəl ABŞ Dövlət Departamenti bəyan etmişdi ki, Tehran dondurulmamış vəsaitləri yalnız humanitar məqsədlər üçün istifadə edə biləcək, amerikalılar isə bu vəsaitlərin hara getməsinə nəzarət edəcək.
“Xarici İşlər Nazirliyi və İran Mərkəzi Bankının səyləri sayəsində ölkəmizin Cənubi Koreyadakı ABŞ-ın qeyri-qanuni təzyiqləri nəticəsində bloklanmış və uzun illər istifadə üçün əlçatmaz olan maliyyə aktivləri blokdan çıxarılıb. Bir neçə həftə davam edən maliyyə və bank prosedurunun nəticəsində vəsait ölkəmizin Qətərdəki banklarına məxsus hesablara köçürüldü. Bu aktivlər artıq İran Mərkəzi Bankının ixtiyarındadır və ehtiyaclardan asılı olaraq hakimiyyət orqanlarının mülahizəsinə əsasən ölkənin prioritetləri üçün istifadə ediləcək”, deyə İran XİN-nin bəyanatında deyilir.
XİN vurğulayıb ki, aktivlərin bloklanması koronavirus pandemiyası zamanı İrana xüsusi ziyan vurub. Nazirlik Qətər hökumətinə maliyyə aktivlərinin təhvil verilməsi və məhbusların mübadiləsi prosesində effektiv roluna görə, Oman Sultanlığına bu prosesin irəliləyişində göstərdiyi dəyərli səylərə və İsveçrə hökumətinə proseslərin sadələşdirilməsinə yardım edilməsində iştirakına təşəkkür edib.
Sentyabrın 18-də Qətərin vasitəçiliyi ilə İran və ABŞ arasında məhbus mübadiləsi baş tutub.
Poliqon.info